स्तनपान नगराउने महिलालाई स्तन र डिम्बासयको क्यान्सरको जोखिम बढ्दो

साउन १९, साेलुखुम्बु ।   सुत्केरी हुँदा स्तनपान नगराउने महिलाहरुमा डिम्बासय र स्तनको क्यान्सर हुने जोखिम उच्च हुने चिकित्सकहरुले बताएका छन् । भरतपुर अस्पतालका स्त्री तथा प्रसुति रोग विभागका प्रमुख प्रा.डा.सुनिलमणि पोखरेलले विभिन्न अध्ययनहरुले स्तनपान गराउने महिलामा भन्दा नगराउने महिलामा क्यान्सरको जोखिम उच्च रहेको देखिएको बताउनु भएको छ । स्तनपान गराउँदा आमाहरुको अक्सिडेसन हर्मोन वृद्धि हुने र त्यसले क्यान्सर हुनबाट जोगाउने गर्दछ ।

कान्तिपुर हेल्थले विश्व स्तनपान सप्ताहको अवसरमा शनिबार भरतपुरमा आयोजना गरेको ‘स्तनपानको महत्वः चिकित्सक-पत्रकार अन्तक्र्रिया कार्यक्रम’ मा बोल्दै प्रा.डा. पोखरेलले महिलाले बच्चा जन्माएपछि पहिलो बिगौती दूधमा अक्सिडेसन हर्मोन बढी हुने र दूध चुसाउँदा पाठेघर खुम्चिने त्यसले गर्दा रक्तश्रावमा हुनबाट जोगिने बताउनु भयो ।

आमाले बच्चालाई स्तनपान गराउँदा स्तनमा संक्रमण हुने, गाँठागुँठी हुने समस्यासमेत नआउने भनाई छ । बच्चाहरुको शारीरिक विकासमा आमाको दूधको महत्वपूणर् भूमिका हुने भन्दै चिकित्सकहरुले रेडिमेड दूध खुवाउँदा अनेकन संक्रमण हुने खतरा हुने बताएका छन् ।

पछिल्लो समय स्तन ठूलो भयो भन्दै त्यसलाई घटाउने औषधि खोजी गर्नेहरु पनि आफूसमक्ष आउने गरेको भन्दै डा. पोखरेलले स्तनपान गराइसकेपछि विभिन्न व्यायाम गरेर मोटोपनसँगै स्तन घटाउन सकिने बताउनु भयो । ‘तर, पहिलाको जस्तै अवस्थामा भने स्तन जाँदैन’, । पछिल्लो समयमा व्यस्तता र सौन्दर्यमा असर पर्ने भन्दै नेपाल लगायत अन्य देशका महिलाहरुले बच्चालाई स्तनपान नगराउने चलन बढ्दै गएको छ ।