सोलु प्रहरीले गर्यो मन्दिर सरसफाइ, मन्दिर व्यवस्थापनका लागि बजेट अभाव

साउन १९, सोलुखुम्बु । हिमाली जिल्ला सोलुखुम्बुको सोलुदुधकुण्ड नगरपालिका वडा नम्बर ५ सल्लेरी स्थित शिव मन्दिरको सरसफाइ गरिएको छ । शनिबार मन्दिर व्यवस्थापन समिति र जिल्ला प्रहरी कार्यालय सोलुखुम्बुले मन्दिर वरिपरि सरसफाइ गरेको हो ।

केही दिनयता रातको समयमा भारी वर्षाले मन्दिर माथिबाट आएको लेदो मन्दिर भित्र पसेको भन्दै धार्मिक स्थलको संरक्षणका लागि सरसफाइ गरिएको शिव मन्दिरका व्यवस्थापन समितिका सचिव एकाकुमारी बस्नेतले बताउनुभयो । विं.स २०६४ सालमा तत्कालीन जिल्ला विकास समितिको १९ लाख १ हजार १ सय ४० रुपैयाँ लागतमा मन्दिरको स्थापना गरिएको थियो । मन्दिरको संरक्षण सम्वर्धनमा सरोकारवालाहरूले चासो नदेखाउँदा जिर्ण र अव्यवस्थित देखिएको बताइएको छ ।

शिव मन्दिरमा दर्शनको लागि भक्तजनहरूको बाक्लो भिड हुने गरे पनि बजेट अभावको कारण मन्दिरलाई व्यवस्थित बनाउन नसकेकोले, कतैबाट बजेट व्यवस्था भएमा मन्दिर व्यवस्थापनको काम तत्काल अघि बढाउन सकिने सचिव एकाकुमारी बस्नेतको भनाई छ ।

जिल्ला प्रहरी कार्यालयका प्रहरी निरीक्षक प्रविण श्रेष्ठको नेतृत्वमा खटिएको प्रहरीको टोलीले सरसफाइ गरेका हुन् । अहिले सरसफाइ पश्चात मन्दिर परिसरको सुन्दरता समेत बढाएको देखिन्छ । उक्त मन्दिरमा साउन महिनाको हरेक सोमबारका दिन शिवका भक्तहरूले दर्शन गर्ने गरेका छन् ।