मोरङको जहदा गाउँपालिकाले मनायो, ६० औं राष्ट्रिय बाल दिवस

भदौ ३१,  सोलुखुम्बु । मोरङको जहदा गाउँपालिका महिला बालबालिका शाखाले ६० औं राष्ट्रिय बाल दिवस भव्यताका साथ मनाएको छ । ‘बालबालिकामा लगानी, सुरक्षित भविष्यको थालनी’ भन्ने मुलनाराका साथ जहदा गाउँपालिका महिला बालबालिका शाखा आयोजना र सहास नेपाल समूहको सहकार्यमा दिवस मनाएको हो ।

दिवसको अवसरमा जनप्रतिनिधि तथा सरोकारवालासँग बालबालिका संवाद कार्यक्रम समेत आयोजना गरिएको संवाददाता मनोज कार्कीले जानकारी दिनुभयो । बाल सञ्जालका उपाध्यक्ष राधिका रिषीदेवका अध्यक्षता तथा जहदा गाउँपालिकाका उपाध्यक्ष हन्ना सोरेनको प्रमुख आतिथ्यतामा कार्यक्रम सम्पन्न गरिएको छ ।

उक्त कार्यक्रममा प्रमुख प्रशासकीय अधिकृत विनोद कुमार भण्डारी, शिक्षा शाखा संयोजक दीपक खनाल, स्वास्थ्य शाखा संयोजक राजकुमार दास, प्रशासन अधिकृत डिल्ली पोखरेल, महिला बालबालिका शाखा संयोजक प्रतिमा यादव, सहास नेपालका प्रतिनिधि गान्धी प्रसाद मण्डलको उपस्थिति रहेको थियो ।

संवाद कार्यक्रममा जहदा गाउँपालिकाका १० वटा विद्यालयका विद्यार्थीहरूले सक्रिय सहभागिता रहेको थियो । विद्यार्थीहरूले शिक्षाको गुणस्तर, शिक्षा पद्धति, र बाल अधिकारका विषयमा जनप्रतिनिधिहरूसँग संवाद गर्दै आफ्ना विद्यालय र गाउँका समस्याहरू राखेका थिए ।

जनप्रतिनिधिहरूले बाल अधिकारको संरक्षण गर्दै शिक्षाको गुणस्तरमा सुधार गर्ने प्रतिबद्धता व्यक्त गरेका छन् । कार्यक्रमको सामाजिक सहजकर्ता अभय मगरले सञ्चालन गर्नु भएको थियोे ।