मौसम नखुलेपछि लुक्लामा ३ दिन देखी हवाई उडान ठप्प 

असोज ३०, सोलुखुम्बु । पर्यटकीय सिजनमा मौसम खराव हुदा लुक्लाका लागी उडेका पर्यटक मन्थलीमै रोकिएका छन् । लुक्लाको मौसम खराब भएपछि रामेछापको मन्थली विमानस्थलबाट ३ दिनदेखि उडान हुन नसक्दा पर्यटक मन्थली विमानस्थलमै रोकिएका हुन् । खुम्बु क्षेत्रको खराब मौसमका कारण उडान हुन नसकेपछि मन्थली विमानस्थलबाट लुक्ला जाने पर्यटक अलपत्र परेका छन् । मन्थली–लुक्ला उडान प्रभावित बनेपछि सगरमाथा क्षेत्र जाने र आउने विदेशी पर्यटक समस्यामा परेका छन् ।

मन्थली विमानस्थलबाट सोमबार र मंगलबार दुवै दिन खुम्बुको खराब मौसमका कारण उडान हुन नसकेको मन्थली विमानस्थलका उप–प्रबन्धक हिरण्य साहले बताए । मन्थलीबाट लुक्ला जाने पर्यटक मौसम खुल्ने आशामा बसेको उनले बताए । मौसम खुलेको समयमा बिहानदेखि साँझसम्म दैनिक ३ वटा निजी क्षेत्रका विमानले ५५ भन्दा बढी उडान भर्दै आएका छन् । मन्थलीबाट काठमाडौं भने तालिकाअनुसार उडान भइरहेको उनले बताए । मन्थलीबाट लुक्ला उडान प्रभावित बनेपछि कतिपय पर्यटक जिरी हुँदै सगरमाथा क्षेत्रमा पैदल जान थालेका छन् । नागरिक उड्डयन प्राधिकरणले सगरमाथा घुम्न जाने पर्यटकलाई लक्षित गरेर मन्थलीबाट–लुक्ला उडान सञ्चालन गर्दै आएको छ ।

मन्थली विमानस्थलबाट निजी क्षेत्रका समिट, तारा र सीता एयरका विमानले सगरमाथा जाने पर्यटकका लागि उडान भर्दै आएका छन् । सगरमाथा क्षेत्र घुम्नका लागि उपयुक्त वसन्त ऋतुको चैत्रदेखि जेठसम्म र शरद ऋतुको असोजदेखि मंसिरसम्म मन्थली विमानस्थलबाट लुक्ला उडान हुँदै आएको छ । लुक्ला उडान खुम्बु क्षेत्रको खराब मौसमका असोज २३ गतेबाट ३ दिन प्रभावित बनेको थियो । यस्तै असोज १० देखि १२ गतेसम्म परेको अविरल वर्षाका कारण मन्थलीबाट लुक्ला उडान हुन सकेको थिएन ।