सोलुको ११ हजार बढी राष्ट्रिय परिचयपत्र जिल्ला प्रशासनमा थन्कीयो 

मंसिर १४, साेलुखुम्बु । हिमाली जिल्ला सोलुखुम्बुका नागरिकको ११ हजार बढी प्रति राष्ट्रिय परिचयपत्र जिल्ला प्रशासनमा थन्किएको जनाइएको छ । कार्यालयमा वितरण हुन बाँकी जिल्लाका आठ ओटै पालिकाको ११ हजार १ सय ३६ प्रति राष्ट्रिय परिचय पत्र जिल्ला प्रशासनमै रहेको जनाइएको हो ।

नेपाली नागरिकताको विकल्पको रूपमा सरकारले अघि सारेको उक्त राष्ट्रिय परिचयपत्र छपाई भइ आएर जिल्ला प्रशासन कार्यालयमा रहेको जनाइएको छ । कार्यालयमा जिल्लाका ८ पालिका मध्ये सोलुदुधकुण्ड नगरपालिकाको ३ हजार ५ सय ८४ थान, थुलुङ दुधकोशी गाउँपाालिकाको २ हजार १ सय ९७ थान, माप्य दुधकोशीको १ हजार ७ सय २९ थान, नेचासल्यान गाउँपालिकाको १ हजार ३ सय ४३ थान राष्ट्रिय परिचयपत्र थन्किएको छ ।

यस्तै खुम्बु पासाङल्हामु गाउँपालिकाको ३ सय ८१ थान, लिखुपिके गाउँपालिकाको ५ सय ५८ थान, महाकुलुङ गाउँपालिकाको ६ सय २५ थान, सोताङको ५ सय ४१ थान र अन्य १ सय ३६ थान गरि जम्मा ११ हजार १ सय ३६ थान राष्ट्रिय परिचयपत्र कार्यालयमा रहेको सहायक प्रमुख जिल्ला अधिकारी रुपेश विश्वकर्माले बताउनुभयो । कार्यालयमा आएको परिचयपत्र प्राप्तिका लागी सम्बन्धत व्यक्ति कार्यालयमा उपस्थित हुनुपर्ने जनाइएको छ ।