रीड नेपालले स्थानीय तहमा शिक्षकको पेशागत विकास तालिमलाई तिव्रता दिदै

मंसिर १६, सोलुखुम्बु । हिमाली जिल्ला सोलुखुम्बुमा रीड नेपालले स्थानीय तहमा शिक्षकको पेशागत विकास तालिमलाई तिव्रता दिइरहेको छ । जिल्लाका स्थानीय तहहरुसँग समन्वय गरी अंग्रेजी, गणित र विज्ञान विषय अब्बल बनाउनका लागि शिक्षकहरुलाई विभिन्न तालिम आयोजना गर्दै तीन दिने तालिमलाई तिव्रता दिइएको हो ।

सोही तालिमका क्रममा आईतबार सोताङ गाउँपालिका र रीड नेपालको संयुक्त आयोजनामा पालिकामा तालिम सुरु गरिएको छ । तालिमको उद्घाटन रीड नेपालका शिक्षा विकास संयोजक केशव देव गिरीको अध्यक्षता तथा पालिका अध्यक्ष खिलाराज बस्नेतको प्रमुख आतिथ्यतामा सम्पन्न भएको जनाइएको छ । कार्यक्रममा बोल्दै गाउँपालिका अध्यक्ष बस्नेतले शिक्षकहरुलाई आफ्नो जिम्मेवारीमा प्रतिबद्ध भएर लाग्न आग्रह गर्दै शैक्षिक सुधारमा आफ्नो पहिलो ध्यान रहेको बताउनुभयो ।

तालिममा सिकेका कुरालाई व्यवहारमा उतार्न पनि शिक्षकहरुलाई अनुरोध गर्नुभएको छ । त्यस्तै कार्यक्रममा बोल्दै रीड नेपालका शिक्षा विकास संयोजक केशव देव गिरीले अंग्रेजी गणित विज्ञान विषयको सिकाइ उपलब्धी अझै कम भएकोले उक्त विषयलाई मध्यनजर गर्दै तालिम संचालन हुने बताउदै सामाजिक र प्रविधीलाई पनि तालिममा समावेश गरिने बताउनुभयो । साथै तालिमले मार्ग निर्देशन मात्र गर्ने हुदा बाकी जिम्मेवारी शिक्षकको नै हुने बताउदै सिकाइ मा सक्रियतासाथ सहभागी भै व्यवहारमा पनि उतार्न आग्रह गर्नुभयो ।

तालिमामा प्रशासन कार्यालयका प्रमुख प्रमुख प्रशासकीय अधिकृत वडा अध्यक्षले तालिम सफलताको शुभकामना व्यक्त गर्नुभएको थियो । साथै सोही कार्यक्रममा रीड नेपालबाट छात्रवृत्ति पाउने विद्यार्थीलाई पालिका प्रमुख खिलराज बस्नेतको हातबाट छात्रवृत्ति वितरण गरिएको छ । जसमा झोला, २ दर्जन कापी ,पेन पेन्सिल, लगाएत अन्य सरसफाईका सामग्री समेत वितरण गरिएको छ । रीड नेपालले सोताङमा १६ जना विद्यार्थीलाई छात्रवृत्ति प्रदान गरिएको जनाइएको छ ।

पालिका भित्रका करिब ५० जना शिक्षकको सहभागीता रहेको तालिममा रीड नेपालका विषय विज्ञ अभिषेक विक्रम शाह, अर्पण रेग्मी, बासु वाग्ले र राजीव ढुंगानाले सहजीकरण गरिरहनु भएको छ । उक्त कार्यक्रममा क्षेत्रीय प्रशासन कार्यालय सोताङका प्रमुख नरेन्द्र कुमार श्रेष्ठ प्रहरी निरीक्षक एकनाथ भट्टराई, प्रमुख प्रशासकीय अधिकृत श्रीध्वज राई र वडा अध्यक्ष मानवीर राई, क्याम्पस प्रमुख दधीराम धमला, वीरेन्द्र ज्योति माविका प्रधानाध्यापक मोतीराम बस्नेत लगायतको उपस्थिति रहेको थियो ।