तिङ्लामा अपाङ्गता भएकाहरूका लागि मखमल र ढाकाको जुता चप्पल तालिम

मंसिर १९, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ तिङ्लामा मखमल ढाका जुता चप्पल बनाउने तालिम सुरु गरिएको छ । घरेलु तथा साना उद्योग कार्यालयको आयोजना तथा सोलुदुधकुण्ड नगरपालिका ११ को समन्वयमा बुधबारबाट अपांगता भएका व्यक्तिहरुलाई लक्षित गरी तालिम सुरु गरिएको हो ।

उद्घाटन कार्यक्रमलाई सम्बोधन गर्दे वडा अध्यक्ष टंक बहादुर कार्कीले अपाङ्गता भएकाहरूको पुनर्स्थापनाका लागि यस खाले कार्यक्रमलाई वडाले प्राथमिकता दिने बताउनुभयो । उहाँले सरकारले गरेको लगानी र सिकेको सिपलाई सदुपयोग गर्दे उद्यमी बन्न आग्रह समेत गर्नुभएको छ ।

यस्तै घरेलु तथा साना उद्योग कार्यालय सोलुखुम्बुका प्रमुख नारायण प्रसाद खतिवडाले हाल प्रदान गरिएको तालिम बेसिक भएकाले संक्रिय भएमा थप तालिम प्रदान गर्ने बताउनुभएको छ । तालिमलाई भरपुर सदुपयोग गर्दै उद्यमी बनी जिल्लालाई जुत्ता चप्पलमा आत्मनिर्भर बनाउने तर्फ लाग्नुपर्नेमा जोड दिनुभयो ।

उक्त तालिममा वडा भित्रका १२ जनालाई सहभागी गराई तालिम सुरुवात गरिएको कार्यक्रम संयोजक टेक बहादुर बस्नेतले बताउनुभयो । तालिमको सहजिकरण बिमला लिम्बुले गर्नुहुने भएको छ । तालिम आजबाट सुरु भई आगामी पुस १८ गते सम्म जारी रहने भएको छ ।