सोलुमा स्थानीयले एक लाख बढीको श्रमदान गरेर बनाए सडक

मंसिर १९, सोलुखुम्बु ।  सोलुखुम्बुको सोलुदुधकुण्ड नगरपालिका वडा नम्बर ४ मा स्थानीयहरुले वडाको पहलमा लाखौ रुपैयाँ खर्च हुने सडक श्रमदान मार्फत ढलान गरेका छन् । स्थानीयबासीहरुले पुल बगर लुरा सडक खण्ड स्थित ठिकेप खोलामा एक लाख पचास हजार लाग्ने सडकको श्रमदान मार्फत सडक सोलिङ तथा ढलान गरेका हुन् ।

बर्खायाममा हिलाम्मे हुने सडक आवतजावत गर्न सहज गर्ने हेतुले स्थानीयहरु एक जुट भएर सडक ढलान कार्य सम्पन्न गरिएको सोलुदुधकुण्ड नगरपालिका वडा नम्बर ४ का वडा अध्यक्ष युवास तामाङले जानकारी दिनुभयो । उक्त सडक निर्माणका लागि सोलुदुधकुण्ड नगरपालिका ५ आरुबोटका नागरिकहरुले गिटी, सोलु कंकट इन्ड्र्सटिज प्रा.लि. का संचालक फनिन्द्र कार्कीले बालुवा श्रमदान गर्नु भएको थियो ।

यस्तै पुल बगर निवासी पुर्ण तामाङले सामान ढुवानीका लागी ट्याक्टर उपलब्ध गराउनुका साथै यार्मदिङ निवासी सर्की घिमिरेद्धारा सिमेन्ट र रड उपलब्ध गराउनुभएको थियो । सरकारको मात्र मुख ताक्ने प्रवृक्ति रहेको सामाजमा लुरा लगायत आसपासका नागरिकहरुले श्रमदान माफर्त लाखौ रुपैयाँ खर्च हुने सडक ढलान गरेर उदाहरणीय काम गरेका छन् । सडक ढलान पछि बर्खा योस् या हिउँद अब सहज तवरबाट यात्रा गर्न सकिने स्थानीयहरुले बताएका छन् ।