सोलुखुम्बुका पत्रकार दाहाललाई अमेरिकी ’एन्टी करप्सन च्याम्पियन अवार्ड’

मंसिर २५, सोलुखुम्बु ।  सोलुखुम्बुका पत्रकार मातृका दाहाललाई अमेरिकामा एन्टी करप्सन च्याम्पियन अवार्ड प्राप्त भएको छ । कान्तिपुरकर्मी दाहालले अमेरिकी सरकारले स्थापना गरेको भ्रष्टाचार विरुद्धको एन्टी करप्सन च्याम्पियन अवार्ड प्राप्त गर्नुभएको हो ।  

अमेरिकी विदेशमन्त्री एन्टोनी जे ब्लिन्केनले पत्रकार दाहाललाई राजधानी वासिङ्टन डिसीस्थित स्थानीय समयअनुसार सोमबार दिउँसो विदेश मन्त्रालयमा आयोजित विशेष समारोहका बीच एन्टी करप्सन च्याम्पियन अवार्ड (एसीसीए) प्रदान गरेका हुन् । अमेरिकी राष्ट्रपतिमा निर्वाचित भइसकेपछि सन् २०२१ मा जो बाइडेन प्रशासनले विश्वभर भ्रष्टाचार विरुद्धको अभियानलाई सशक्त पार्न र संसारभर सुशासन कायम गर्ने लक्ष्यका साथ विभिन्न पेसा व्यवसायमा रहेर उत्कृष्ट काम गर्नेलाई सम्मान गर्न यो अवार्ड विदेश मन्त्रालय मार्फत प्रदान गर्ने गरी स्थापना गरेका थिए ।

सोही अन्तर्गत सन् २०२४ का लागि अमेरिकी विदेश मन्त्रालयले कान्तिपुर दैनिकका पत्रकार दाहाललाई यो अवार्ड प्रदान गरेको हो । नेपालीलाई नक्कली भुटानी शरणार्थी बनाएर अमेरिका लैजान रचिएको अपराधसहित भ्रष्टाचारका समाचार सम्प्रेषण गरेका पत्रकार दाहालले भ्रष्टाचार विरुद्ध साहसिक काम गरेको अवार्डमा उल्लेख छ । दाहालसहित सन् २०२४ का लागि यो अवार्ड अन्य मुलुकका ९ जनालाई पनि प्रदान गरिएको छ ।