खुम्बु क्षेत्रमा हेलिकप्टर उडानमा रोक लगाउने परिपत्रप्रति सगरमाथा टोल विकास संस्थाको सहमति

मंसिर २९, सोलुखुम्बु । सगरमाथा टोल विकास संस्था खुम्बु पासाङल्हामु गाउँपालिका ४ पाङबोचले खुम्बु क्षेत्रमा हेलिकप्टर उडानलाई पूर्ण रुपमा प्रतिबन्ध लगाउने परिपत्रप्रति सहमति जनाएको छ । सगरमाथा राष्ट्रिय निकुञ्जले आउँदो पुस १७ गतेदेखि हेलिकप्टरको व्यावसायिक उडान÷अवतरणमा रोक लगाउने परिपत्रप्रति सहमति जनाएको हो ।

साथै संस्थाले सगरमाथा क्षेत्रको संरक्षण र दीर्घकालीन विकासका लागि हेलिकप्टरको उडानमा रोक लगाउन सबै सरोकारवालाहरुलाई सहकार्य गर्न आगह समेत गरेको सगरमाथा टोल विकास संस्थाका अध्यक्ष लोटोक जाङबु शेर्पाले जानकारी दिनुभयो । यस क्षेत्रको प्राकृतिक सोन्दर्य, जैविक विविधता र सांस्कृतिक धरोहरलाई कायम राख्न सबै पक्षको जिम्मेवार भूमिका आवश्यक रहेको अध्यक्ष शेर्पाले उल्लेख गर्नुभएको छ ।

संयुक्त प्रयास र सहकार्यले मात्र यस क्षेत्रको पर्यावरणीय सन्तुलन र टिकाउ विकास सुनिश्चत गर्न सकिन्छ भन्दै प्रेस विज्ञप्ति जारी गरेको छ । खुम्बु पासाङल्हामु गाउँपालिका क्षेत्रमा हेलिकप्टर दलाली गर्ने वा पर्यटकलाई हेलिकप्टर प्रयोग गर्न प्रेरित गर्ने कुनै पनि गतिविधि भएमा व्यक्ति, एजेन्ट वा कम्पनीविरुद्ध कारबाहीका लागि सिफारिस गरिने समेत चेतावनी दिएको छ ।

सगरमाथा क्षेत्रको पर्यावरणीय सन्तुलन, स्थानीय जनताको हित र पर्यटक व्यवस्थापनलाई थप प्रभावकारी बनाउन मंसिर २५ गते का दिन सगरमाथा राष्ट्रिय निकुञ्ज कार्यालय, नाम्चेमा विषेश बैठक आयोजना गरिएको थियो । बैठकमा सगरमाथा राष्ट्रिय निकुञ्ज, खुम्बु पासाङल्हामु गाउँपालिका, खुम्बु बफर जोन कमिटी, महिला समूह, युवा क्लब, टोल विकास संस्था र स्थानीय बुद्धिजीवीहरुको सक्रिय सहभागिता रहेको थियो ।

बैठकले अनावश्यक र मनपरी हेलिकप्टर उडान तथा व्यवसायिक प्रयोजनका लागि गरिने उडानलाई पूर्ण रुपमा प्रतिबन्ध लगाउने र पर्यटकलाई घोडाको माध्यमबाट माथिल्लो क्षेत्रतर्फ लैजाने कार्यलाई रोक्ने सहमति गर्दै यसबारे कडा निर्णय गरिएको थियो । उक्त निर्णयमा नेपाल नागरिक उड्डयन प्राधिकरण (क्यान) ले खुम्बु क्षेत्रमा हेलिकप्टर उडानमा रोक लगाउने भनी गरिएको पत्राचारप्रति आपत्ति जनाएको छ ।