नेचासल्यानमा सामुदायिक विद्यालय शिक्षकहरुका लागि योग प्रस्तोता प्रशिक्षण

पौष ९, सोलुखुम्बु । सोलुखुम्बुको नेचासल्यान गाउँपालिकामा सामुदायिक विद्यालय शिक्षकहरुका लागि योग प्रस्तोता प्रशिक्षण तालिम सुरु भएको छ । गौरीशंकर गुरुकुलको सभाहल नेचासल्यान २ सल्यान केउरेनीमा ५ दिने योग प्रस्तोता प्रशिक्षण तालिम सुरु भएको हो ।

योग र ध्यानले मानिस अनुशासित हुने, स्वस्थ रहने र मानसिक विकार हटेर उदेश्यले गाउँपालिकाले तालिम आयोजना गरेको सहकर्मी सोभित ढुगेंलले जानकारी दिनुभयो । तालिमको नेचासल्यान गाउँपाकाकी उपाध्यक्ष विना राईले उद्घाटन गर्नुभएको छ ।

उद्घाटन कार्यक्रममा बोल्दै उपाध्यक्ष राईले योग र ध्यानबाट हरेक मानिसका लागि सकारात्मक उत्प्रेरणा आवश्यक रहेको भन्दै जीवन धकेल्ने नभई असल जीवन यापन गर्न असल उत्प्रेरणा मिल्ने बताउदै सिकेको ज्ञानलाई विद्यार्थी माझ लैजान आग्रह गर्नुभयो । तालिमका सहाभागीलाई जीवन विज्ञानका प्रशिक्षक गणेश निरौला र सुजाता घिमिरे दाहालले प्रशिक्षण दिइरहनुभएको छ ।

योग प्रस्तुत प्रशिक्षणमा वडा नं २ का वडा अध्यक्ष शिताराम काफ्ले, शिक्षा शाखा प्रमुख माधवमणी ढुंगाना, गौरीशंकर गुरुकुलका अध्यक्ष पुन्य प्रसाद दाहालले शुभकामना मन्तव्य राखेका थिए । पौष ९ गतेबाट सुरुभएको योग प्रस्तोता प्रशिक्षण तालिम १३ गते सम्म जारी रहने भएको छ ।