ऐतिहासिक केपिलासगढीमा गाउँपालिकाको कार्यपालिका बैठक, आफैमा नयाँ सुरुवात भएको अध्यक्ष राईकाे भनाई

पौष ११, सोलुखुम्बु ।  खोटाङको केपिलासगढी गाउँपालिकाले आफ्नो नियमित कार्यपालिका बैठक ऐतिहासिक केपिलासगढीमा गरेको छ । गाउँपालिकाको सभाहलमा हुँदै आएको नियमित कार्यपालिका बैठक गाउँपालिकाले गढीमा गएर पहिलोपटक सञ्चालन गरेको हो ।  गाउँपालिका नामाकरणको आधार समेत रहेको केपिलासगढीमा बसेको बैठकलाई गाउँपालिकाले ऐतिहासिक मानेको छ ।  गाउँपालिकाले गढीमा आयोजना गरेको कार्यपालिका बैठकमा केपिलासगढीको विषयमा विज्ञले कार्यपत्र प्रस्तुत गरेका थिए  ।

  पाटन संयुक्त क्याम्पसका पूर्व प्राध्यापक चतुरभक्त राईले एक कार्यपत्र प्रस्तुत गर्दै कार्यपत्रमा केपिलासगढी, यसको ऐतिहासिक पक्ष, यसमा गरिएका प्रयासहरू, अब गरिनु पर्ने कार्य समेत उल्लेख रहेको गाउँपालिकाका प्रमुख प्रशासकीय अधिकृत सौधन राईले बताउनुभयो ।  उहाँले कङ्क्रिटको भवन भित्र सोफामा बसेर गरिएको कार्यपालिका बैठक भन्दा प्रकृतिको काखमा बसेर बैठक गर्दा खुसि मिलेको उल्लेख गर्नुभयो । केपिलासगढीमा गरिएको बैठकलाई उहाँले जलवायु असर न्यूनिकरणमा गर्नु पर्ने अभियान र प्रयासको साङ्केतिक रूप भएको बताउनुभएको छ ।  

जलवायू परिवर्तनको असरबाट जोखिम क्षेत्रमा पर्ने केपिलासगढी गाउँपालिकाले जलवायु असर न्यूनिकरणको लागि आफ्नो वार्षिक नीति, कार्यक्रमका साथै विभिन्न गैर सरकारी संस्थासँगको सहकार्यमा कार्यक्रम सञ्चालन गर्दै आएको छ ।  बैठब गाउँपालिका अध्यक्ष समिर राईको अध्यक्षतामा सम्पन्न भएको थियो ।  उहाँले केपिलासगढीमै गएर कार्यपालिका बैठक गर्नु आफैमा नयाँ सुरुवात भएको बताउनुभयो ।  उहाँले गाउँपालिकाले केपिलासगढीको ऐतिहासिक महत्व र यसको संरक्षण सम्वर्द्धन र प्रवर्द्धनलाई ध्यानमा राखेको उल्लेख गर्नुभयो ।