चिशंखुगढीमा अपाङ्गता भएका व्यक्तिहरुको पालिका स्तरीय संस्थाका पदाधिकारीलाई क्षमता विकास तालिम

माघ ५, सोलुखुम्बु । ओखलढुगांको चिशंखुगढी गाउँपालिमाअपाङ्गता भएका व्यक्तिहरुको पालिका स्तरीय संस्थाका पदाधिकारीलाई क्षमता विकास तालिम प्रदान गरिएको छ । कोशी प्रदेश सरकार, चिशंखुगढी गाउँपालिका र करूना फाउन्डेसनको त्रिपक्षीय लागत साझेदारी तथा राष्ट्रिय अपाङ्ग महासंघको प्राबिधिक सहयोगमा पदाधिकारीहरुलाई दुई दिने तालिम प्रदान गरिएको हो । अपाङ्गता रोकथाम तथा पुन : स्थापना कार्यक्रम अन्तर्गत यहीँ माघ ४ र ५ गते चिशंखुगढी गाउँपालिकाको सभाहलमा तालिम सञ्चालन गरिएको गाउँपालिकाले जनाएको छ । सरकारको सीबीआर कार्यक्रम नेपाल सरकार महिला, बालबालिका तथा समाजकल्याण मन्त्रालयले २०५८ देखि अपाङ्गता भएका व्यक्तिहरूको हकहित संरक्षणलगायत उनीहरूको सशक्तीकरण र विकासका लागि जिल्लाजिल्लामा सिबीआर कार्यक्रम सञ्चालन गर्दै आएको छ ।

राज्यको संलग्नता साथै स्थानीय स्तरमै उपलब्ध साधन र स्रोतको अधिकतम परिचालन गरी अपाङ्गता भएका मानिसहरूलाई उनीहरूको समुदायमै पुनस्र्थापित गराई शिक्षा, स्वास्थ्य र सहज जीवनयापनमा पहुँच पुर्याउँदै उनीहरूको सामाजिक सहभागिता र सशक्तीकरणमा टेवा पुर्याउने उद्देश्यका साथ सञ्चालित यस कार्यक्रम हाल देशका ७५ वटै जिल्लामा पुगिसकेको छ । स्थानीय स्तरमा अपाङ्गता भएका व्यक्तिहरूद्वारा सञ्चालित संस्थाहरूलाई नै यस कार्यक्रमको प्रमुख वाहक बनाउने नीति लिई आव २०६६/०६७ देखि यस कार्यक्रमलाई ७५ वटै जिल्लामा निरन्तरता दिइएको छ ।