खिजीदेम्बा गाउँपालिकाका १ सय ८ घर शेर्पालाई ध्वजा फहराउन फलामे डन्डी 

माघ २०, सोलुखुम्बु ।  ओखलढुङ्गाको खिजीदेम्बा गाउँपालिकाका शेर्पा समुदायलाई ध्वजा टङ्गने फलामे खम्बाको व्यवस्था गरिएको छ । शेर्पा समुदायमा निहित सांस्कृतिक ध्वजा फहराउने परम्परालाई जोगाइराख्न स्थानीय समाजिक संस्था महामानव बुद्ध युवा क्लबको पहलमा १ सय ८ घरधुरीलाई फलामे थम्बा वितरण गरिएको हो ।

शेर्पा समुदायले बर्षै पिच्छे ध्वजा फेर्नुपर्ने बाध्यतालाई हेर्दै दीर्घकालीन फलामे थम्बा वितरणका लागी धर्म गुरु तेम्बा शेर्पाको आर्थिक सहयोगमा छोतर सहित फलामे थम्बा वितरण गरिएको हो ।  वन फडानी रोकौँ, वातावरण सँगै संस्कृति जोगाउँ भन्ने उद्देश्य सहित शनिबार फलामे थम्बा वितरण गरिएको हो । गाउँपालिका अध्यक्ष गम्बु शेर्पाको उपस्थितिमा स्थानीय शेर्पा समुदायको घरघरमा थम्बा वितरण गरि ध्वजा फहराइएको छ ।

 बर्सेनी ध्वजा फेर्न वन फडानी गर्नुपर्ने शेर्पा समुदायको बाध्यतालाई फलामे थम्बाले धेरै हदसम्म चिर्ने अध्यक्ष शेर्पाको भनाई छ ।  उहाँका अनुसार यसरी वितरण गरिएको थम्बाले कम्तीमा ७ वर्ष काम गर्ने आँकलन गरिएको छ ।  गाउँपालिका भरि करिव ९ सय शेर्पा परिवारको बसोबास रहेकाले आगामी दिनमा फलामे थम्बा वितरणलाई पालिकाले अभियानको रुपमा सञ्चालन गर्ने गरि काम गरिने अध्यक्ष शेर्पाले बताउनुभयो । उहाँका अनुसार यो कदमले वर्षेनी ९ सय बोट राम्रो बिरुवा जङ्गलबाट फडानी हुने अवस्थालाई रोक्ने छ ।