लिजाको मुल्याङ्कनमा गोलन्जोरले प्राप्त गर्यो ६५ प्रतिशत अंक

माघ २७, सोलुखुम्बु ।  स्थानीय तह सक्षमता मूल्याङ्कन (लिजा)मा सिन्धुलीका गोलन्जोर गाउँपालिकाले ६५ प्रतिशत अङ्क प्राप्त गरेको छ ।  गत आर्थिक वर्षमा ५८ अङ्क मात्रै प्राप्त गरेको गाउँपालिकाले यस वर्ष ८ अङ्क सुधार गर्दै ६५ प्रतिशत प्राप्त गरेको हो ।  स्थानीय तह संस्थागत क्षमता मूल्याङ्कन लिसाले विभिन्न १० विषयक्षेत्र समेटर गर्ने मूल्याङ्कनमा यस वर्ष गाउँपालिकाले ८ विषय क्षेत्रमा आफ्नो अङ्क वृद्धि गर्दै अघिल्लो सालको स्थान भन्दा माथि आएको हो । गाउँपालिकाले गत वर्ष झै यस वर्ष पनि न्यायीक कार्य सम्पादन शत प्रतिशत सम्पन्न गरेको छ  भने सार्वजनिक सेवा प्रवाहको पनि अङ्क बढाएको छ ।  

गत वर्ष ६८ दशमलव ७५ प्रतिशतमा सीमित रहेको गाउँपालिकाको सेवा प्रवाह यस वर्ष ८४ दशमलव ३८ प्रतिशत पुगेको छ । यस्तै गाउँपालिकाले शासकीय प्रबन्ध विषयक्षेत्रको ७५ प्रतिशत, सङ्गठन तथा प्रशासनमा ५६ प्रतिशत, वार्षिक बजेट तथा योजना व्यवस्थापनमा ५९ दशमलव ०९ प्रतिशत, वित्तिय एवं आर्थिक व्यवस्थापनमा ७० दशमलव ४५ प्रतिशत, भौतिक पूर्वाधारमा ४२ दशमलव ३१ प्रतिशत, सामाजिक समाबेसिकरणमा ४० प्रतिशत अङ्क प्राप्त गरेको छ ।  

यस्तै वातावरण संरक्षण र विपद व्यवस्थापनमा ७२ दशमलव २२ प्रतिशत र सहकार्य र समन्वयमा ५० प्रतिशत अङ्क प्राप्त गर्दै ६५ प्रतिशत अङ्क बनाएको हो ।  गाउँपालिकाले १० विषय क्षेत्र मध्ये वातावरण संरक्षण र विपद व्यवस्थापनमा अघिल्लो वर्षको भन्दा ५ प्रतिशत अङ्क गुमाएको छ भने भौतिक पूर्वाधारमा पनि अङ्क गुमाएको छ ।  तर अन्य ८ विषयक्षेत्रमा गाउँपालिकाले राम्रो सुधार गरेको छ । देशभरका ७ सय ५३ वटै स्थानीय तहमा जवाफदेहिता, पारदर्शिता र प्रतिस्पर्धा प्रवद्र्धन गर्दै सुशासन कायम गर्ने उद्देश्यले स्थानीय तह स्वमूल्यांकन प्रणाली (एलआईएसए) संघीय मामिला तथा सामान्य प्रशासन मन्त्रालयले कार्यान्वयनमा ल्याएको छ ।