चिशंगुगढी २ पाेखरेमा क्याप्टेन यज्ञ बहादुर थापाको पूर्णकदको शालिक अनावरण 

माघ २८, सोलुखुम्बु ।  सहिद क्याप्टेन यज्ञ बहादुर थापाको पूर्णकदको शालिक अनावरण गरिएको छ । चिशंखुगढी गाउँपालिका वडा नम्बर २ पोखरे तिनधारेमा निर्माण गरिएको थापाको शालिक अनावरण गरिएको हो ।  २०३१ पौष १ मा सोलुखुम्बुको टिम्बुरबोटे भन्ने स्थानबाट पक्राउ गरि जे्रल राखिएका थापालाई २०३५ माघ २५ गते मृत्युदण्ड दिइएको थियो ।   सहिद थापालाई तत्कालीन पञ्चायत व्यवस्थाले राजद्रोहको कसुरमा मृत्युदण्ड दिएको दिनको सम्झनामा उहाँको शालिक अनावरण गरिएको चिसंखुगढी गाउँपालिकाले जनाएको छ ।

 चिशंखुगढी गाउँपालिकाको लागतमा निर्मित शहीद थापको शालिक आइतबार  ४७ औँ  स्मृतिको अवसरमा उहाँकी  धर्मपत्नी पूर्णकुमारी थापाले अनावरण गर्नुभएको हो ।  चिशंखुगढी गाउँपालिकाका अध्यक्ष निशान्त शर्माको अध्यक्षतामा सम्पन्न एक औपचारिक समारोहका बीच सम्पन्न शहीद थापाको शालिक अनावरण कार्यक्रममा गाउँपालिका अध्यक्ष निशान्त शर्माले गाणतन्त्रको स्थापनाका लागी क्याप्टेन थापाको योगदान राष्ट्रले कहिल्यै नभुल्ने बताउनुभयो ।  

थापाले तत्कालीन पञ्चायती सेनासँग विद्रोह गरेर गणतन्त्र स्थापनाका लागी तत्कालीन विद्रोही पक्ष (काङ्ग्रेस) सँग सहकार्य गर्नुभएको थियो । कार्यक्रममा थापाकी धर्मपत्नी पूर्ण कुमारी थापा लगायत पारिवारिक सदस्यहरू, चिशंखुगढी गाउँपालिकाका उपाध्यक्ष सन्तोष बाबु थापा, प्रमुख प्रशासकीय अधिकृत सिताराम राई, वडा नम्बर २ का वडा अध्यक्ष नरेन्द्र बस्नेत लगायत नेकपा माओवादी केन्द्रका जिल्ला संयोजक रामकुमार कार्की ,नेपाली काङ्ग्रेसका महासमिति सदस्य नवीन राई नेकपा एमालेका जिल्ला सचिव अशोक थापा लगायतका वक्ताले आफ्नो मन्तव्य राख्नुभएको थियो ।  कार्यक्रममा सहिद थापाको परिवारलाई सम्मान पत्र र दोसल्ला ओडाएर सम्मानित गरिएको जनाइएको छ ।   गत २०७६ जेठ १५ गते नेकपा माओवादी केन्द्रका अध्यक्ष पुष्पकमल दाहालले थापको शालीकको शिलान्यास गर्नुभएको थियो ।