खिजिदेम्बामा सकियो तीन दिने सांस्कृतिक महोत्सव

फागुन १०, सोलुखुम्बु । ओखलढुङ्गाको खिजिदेम्बा गाउँपालिकामा सांस्कृतिक महोत्सव सम्पन्न भएको छ । ‘बहुल जाती भाषा संस्कार संस्कृति र विविधता हाम्रो पहिचान, समृद्ध खिजिदेम्बा निर्माणका लागि सामूहिक अभियान’ भन्ने मुल नाराका साथ खिजिफलाटे बजारमा आयोजना गरिएको तीन दिने महोत्सव सम्पन्न भएको हो ।

गाउँपालिकामा रहेका आदिवासीहरुको भाषा, संस्कार, संस्कृतिको प्रवद्र्धन र संरक्षणका लागि जोड दिँदै पर्यटन विकास गर्ने उद्देश्यले महोत्सवको आयोजना गरिएको गाउँपालिका अध्यक्ष गम्बु शेर्पाले बताउनुभयो । आदिवासी जनजातीहरुको संरक्षण, संस्कृतिको उत्थान, प्रबद्र्धन र सम्बद्र्धन गर्दै पहिचान र सभ्यतालाई उजागर गरी सशक्तिकरणको माध्यमबाट राज्यमा समान पहुँच स्थापना गर्न महोत्सव आयोजना गरिएको अध्यक्ष शेर्पाको भनाई छ ।

गाउँपालिकाको आर्थिक सहयोगमा नेपाल आदिवासी जनजाति समन्वय परिषद्को आयोजनामा फागुन ७ देखि ९ गतेसम्म महोत्सवको सञ्चालन भएको आयोजक समितिका अध्यक्ष कमलकृष्ण तामाङले बताउनुभयो । महोत्सवमा सांस्कृतिक प्रवद्र्धन र पुस्तान्तरणका लागि मौलिक नृत्य प्रतियोगिता सञ्चालन गरिएको अध्यक्ष तामाङले जानकारी दिनुभयो ।