थामे बाढी प्रभावितलाई पहिलो किस्ता दिइने, विपद समाना गर्न एक जुट हुने जनप्रतिनिधिको प्रतिबद्धता

फागुन २०,  साेलुखुम्बु ।      सोलुखुम्बुको थामे बाढी प्रभावित घरधुरीलाई आवास निर्माण बापतको पहिलो किस्ता निकासा गरिने भएको छ । प्रमुख जिल्ला अधिकारी अनोज कुमार घिमिरेको अध्यक्षतामा जिल्ला प्रशासन कार्यालयमा बसेको बैठकले गत साउन ३२ गते आएको बाढीले क्षतिग्रस्त ५० घरपरिवारको आवास निर्माणका लागि पहिलो किस्ता बापतको २५ हजार रकम निकासा गर्ने निर्णय गरेको हो । प्रदेश सांसद, स्थानीय तहका जनप्रतिनिधि लगायत सरोकारवाला सम्मिलित बैठकले गत असोज १० गतेदेखि १३ गतेसम्म परेको अविरल वर्षाका कारण प्रभावित भएका ३१  वटा पूर्वाधार तथा संरचना मर्मतका लागि खानेपानी सिँचाई तथा उर्जा मन्त्रालय कोशी प्रदेशमा सिफारिस गर्ने निर्णय गरेको छ । 

यस्तै सोलुदुधकुण्ड नगरपालिका ५ मा निर्माणधीन शेर्पा सामुदायिक भवनलाई पहिरोले क्षतिग्रस्त बनाएकाले पहिरो व्यवस्थापनका लागि प्राविधिक लागत अनुमान सहित सहरी विकास तथा भवन कार्यालयमा सिफारिस गर्ने निर्णय भएको  भने  पहिरोबाट क्षतिग्रस्त भएका आवास पुननिर्माणका लागि बजेट निकासाका लागि मन्त्रालयमा सिफारिस गर्ने, आगलागी पीडितका लागि रकम निकासाका लागि पहल गर्ने समेत निर्णय भएको प्रमुख जिल्ला अधिकारी अनोज कुमार घिमिरेले जानकारी दिनुभयो ।  

बैठकमा प्रमुख अतिथिको रुपमा बोल्दै पूर्व मन्त्री तथा प्रदेश सभा सदस्य बुद्धिकुमार राजभण्डारीले विकासमा राजनीति नगर्न आग्रह गर्दै आफूले विपद व्यवस्थापन देखि जिल्लाको समग्र विकासमा प्रदेश सरकारसँग पहल गरेर काम गरिरहेको बताउनु भयो । प्रमुख जिल्ला अधिकारी अनोज कुमार घिमिरेले स्थानीय तहमा स्रोत साधन  हुने भएकाले विपद व्यवस्थापनमा  खुट्टा नकमाउन आग्रह गर्नुभएको छ । सो क्रममा लिखुपिके गाउँपालिका अध्यक्ष मिना कार्की बस्नेतले विपदको पुर्व तयारीमा चुकेको भन्दै भाषणमा नभई व्यवहारमा नै विपद व्यवस्थापनमा लाग्नु पर्ने धारणा राख्नु भयो । 

महाकुलुङ गाउँपालिका अध्यक्ष सुर्य बहादुर कुलुङले भौतिक संरचनाहरू कमजोर बनेका कारण प्राकृतिक विपद्मा क्षति हुने गरेको बताउनु भयो । खुम्बु पासाङल्हमु गाउँपालिकाका अध्यक्ष मिङ्मा छिरी शेर्पाले खुम्बु क्षेत्रमा हिमताल बिस्फोटनका उच्च जोखिम रहेको भन्दै पूर्वतयारी र उच्च सतर्कता अपनाउन आवश्यक रहेको बताउनु भयो । माप्य दुधकोशी गाउँपालिकाका उपाध्यक्ष गौरव राईले विपद व्यवस्थापनको भार स्थानीय तहलाई मात्रै परेको गुनासो गर्नु भयो ।

सोताङ गाउँपालिका उपाध्यक्ष अन्जु नाछिरिङले आफ्नो पालिका भित्र आगलागिका घटनाहरु बढेको भन्दै सतर्कता अपनाउँदै गएको धारणा राख्नु भयो । सोलुदुधकुण्ड नगरपालिकाका प्रमुख प्रशासकीय अधिकृत टुक्ति शेर्पाले पहिरो र आगलागिका घटना प्रमुख चुनौति रहेको बताउनु भयो ।  सो अवसरमा जिल्ला प्रहरी प्रमुख डिएसपि द्वारिका प्रसाद घिमिरेले जिल्लाभरिको बिपदको अवस्था बारे प्रस्तुति राख्नु भएको थियो ।