तिङ्लाबाट नेचा जोड्ने सडक कालोपत्रे गरिँदै, मेयर शेर्पा र वडाअध्यक्ष कार्कीद्धारा शिलान्यास

फागुन २२, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ तिङ्लाबाट नेचासल्यान गाउँपालिका जोड्ने सडक कालोपत्रे गरिने भएको छ । बिहिबार सोलुदुधकुण्ड नगरपालिकाका मेयर नाम्गेल जाङ्बु शेर्पा र वडा नम्बर ११ का वडा अध्यक्ष टंकबहादुर कार्कीले संयुक्त रुपमा शिलान्यास गर्नुभएको हो ।

सडक डिभिजन हर्कपूर ओखलढुगांको लागत र सोलुदुधकुण्ड नगरपालिकाको बिषेश पहलमा भ्याट सहित १ करोड ८१ लाख ४ हजार ७ सय ५० रुपौयाँ ६४ पैसामा सडक कालोपत्रे गरिने भएको छ । गत पौष २९ गते भुजेल निमार्ण सेवा ओखलढुगांलाई ठेक्कामा दिई माघ २ गतेबाट कालोपत्रेको काम सुरु गरिएको सडक, आगामी असार २० गते भित्र सम्पन्न गरिने सझौतापत्रमा उल्लेख गरिएको छ ।

शिलान्यास कार्यक्रममा बोल्दै सोलुदुधकुण्ड नगरपालिकाका मेयर नाम्गेल जाङ्बु शेर्पाले तिङला जिरो पोइन्टबाट तत्काल एक किलोमिटर सडक कालोपत्रे गर्ने र त्यहाबाट ५ कि.मि सडक ग्राभेलको टेन्डर प्रकृया अघि बढाइएको बताउनुभयो । ग्रामीण विद्युतको काम देखि शैक्षिक पूर्वधारमा गुणस्तर साथै तिङला, विकास तुलनामा पहिलेको भन्दा अहिले धेरै अगाडी बढेको उहाँले दाबी गर्नुभयो । साथै अब चाडौ तिङलामा सुविधा सम्पन्न्न स्वास्थ चौकी भवन बनाउनका लागि टेन्डरको अन्तिम चरणमा रहेको बताउनुभयो ।

यस्तै तिङलाका जनताको माग बमोजिम सडक कालोपत्रे देखि सुविधा सम्पन्न्न स्वास्थ चौकी निर्माण हुने भएकोमा मेयर शेर्पालाई विशेष धन्यवाद दिदै वडा अध्यक्ष टङक बहादुर कार्कीले खुसी व्यक्त गर्नुभयो ।यता निर्माण कम्पनीका प्रतिनिधि मदनकुमार राईले गुणस्तरीय सडक कालोपत्रे गर्नेमा कुनै कन्जुस्याई नगर्ने प्रतिबद्धता व्यक्त गर्नुभयो । उक्त शिलान्यास कार्यक्रममा सोलु दुधकुण्ड नगरपालिकाका कार्यपालिका सदस्य निरकुमार नेपाली, वडा नम्बर ११ का वडा सदस्य तथा विभिन्न राजनीतिक दलका प्रतिनिधिहरूको बाक्लो उपस्थिति रहेको थियो ।