सोलुखुम्बुमा मोतियाबिन्दु छनौट शिविर जारी, हाल सम्म ५३ जना बिरामी भेटिए

फागुन २५, सोलुखुम्बु । हिमाली जिल्ला सोलुखुम्बुमा फागुन १६ गतेबाट सुरु भएको मोतियाबिन्दु छनौट शिविर जारी छ । जिल्लाको माप्य दुधकोशी गाउँपालिका बासा स्थित प्राथमिक अस्पतालबाट सुरु भएको शिविरबाट ५३ जना मोतियाबिन्दुका बिरामी भेटिएको जिल्ला सामुदायिक आँखा केन्द्रका प्रमुख बिदान ताम्राकारले जानकारी दिनुभयो ।

जिल्ला सामुदायिक आँखा केन्द्र फाप्लु र तिलगंगा आँखा केन्द्रको संयुक्त आयोजनामा संचालन गरिएको शिविरबाट माप्य दुधकोशी गाउँपालिका खास्तपमा १ सय ४६ जनाले आँखा चेकजाँच गराउदा १० जनामा मोतिविन्दु देखिएको छ । यस्तै महाकुलुङ गाउँपालिकामा भएको शिविरबाट २ सय ७ जनाको आँखा परिक्षण गराउदा ३ जना शल्यक्रियाका लागी छनौट भएको प्रमुख ताम्राकारले बताउनुभयो ।पेल्माङमा सञ्चालित शिविरबाट१५१ जनाको परिक्षण गराउदा ५ जनामा समस्या देखिएको छ ।

सोताङ गाउँपालिका १ मा ८० जनाको परिक्षण गर्दा ६ जना, सोताङ प्राथामिक अस्पताल १५६ जनाको परिक्षण गर्दा, १३ जना, वाकुमा ११२ को गर्दा ३ जना, जुबुमा ८२ जनाको परिक्षण गर्दा ७ जना र पन्चनमा ७५ जनाको परिक्षण गर्दा ६ जनामा समस्या देखिएको जिल्ला सामुदायिक आँखा केन्द्रका प्रमुख ताम्राकारले बताउनुभयो । यस शिविर आउँदो चैत्र ४ गते सम्म जारी रहने र चैत्र ७ र ८ गते जिल्ला सामुदायिक आँखा केन्द्र फाप्लुमा शल्यक्रिया गरिने जनाएको छ ।