फर्जी भर्ना गरिएको भन्दै सोलुका दुई क्याम्पसमा तालाबन्दी

फागुन २७, सोलुखुम्बु । अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी) जिल्ला कमिटी सोलुखुम्बुले सोलुखुम्बुका दुई क्याम्पसमा तालाबन्दी गरेको छ । लामो समयपछि आगामी चैत ५ गते हुन लागेको स्वतन्त्र विद्यार्थी युनियनको निर्वाचन नितान्त विद्यार्थीहरुको निम्ति भएको तर सोताङ पब्लिक क्याम्पस र विपि कोइराला संस्कृत विधापीठ नेचासल्यानले गलत नियतले फर्जी विद्यार्थी भर्ना गरिएको भन्दै मंगलबार क्याम्पसमा तालाबन्दी गरिएको हो ।

क्रान्तिकारीले एक विज्ञप्ति निकाल्दै फर्जी विद्यार्थी भर्ना र मतदाता नामवली प्रक्रियामा सार्वजनिक भएको नाम स्वयंम विद्यार्थीलाई समेत जानकारी नभएकोले तत्काल फर्जि भर्ना र नामवली खारेज गरि निर्वाचन प्रक्रिया अगाडि बढाउन आग्रह गरिएको छ, भने माग सम्बोधन नभए सम्म उक्त क्याम्पसमा तालाबन्दी गरिएको अखिल नेपाल राष्ट्रिय स्वतन्त्र विद्यार्थी युनियन – क्रान्तिकारी) जिल्ला कमिटी सोलुखुम्बुका अध्यक्ष सोनाम शेर्पाले बताउनुभयो ।

यस्तै अखिल क्रान्तिकारीका विद्यार्थी नेता मोहन बस्नेतले नेपालको शैक्षिक इतिहासमा स्थापनाकाल देखि नै अखिल क्रान्तिले नेपालको शैक्षिक सुधारको निम्ति सधै बुलन्द आवाज गर्दै शैक्षिक आन्दोलनको अग्रपंतिमा रहेको उल्लेख गर्दै माग सम्बोधन नभए सम्मा ताला नखोलिने अडान लिनुभएको छ ।