ओखलढुङ्गामा देशकै पहिलो सरकारी लगानीमा निर्मित जिप लाइन सञ्चालनमा

जेठ ११, सोलुखुम्बु ।  ओखलढुङ्गाको मानेभन्ज्याङ गाउँपालिकामा देशकै पहिलो सरकारी लगानीमा जिप लाइन निर्माण गरिएको छ ।  गाउँपालिकाको वडा नम्बर ४ स्थित केत्तुके बजारमा देशकै पहिलो सरकारी लगानीमा निर्मित जिप लाइन शुक्रबार आज उद्घाटन गरिएको हो ।

ओखलढुङ्गाका संघीय सांसद रामहरी खतिवडाको प्रमुख आतिथ्यमा जिप लाइनको उद्घाटन गरिएको वडा अध्यक्ष विष्णु तामाङले बताउनुभयो । संघीय सरकारको ४६ लाख रुपैयाँ बजेटमा निर्मित जिपलाई आजैबाट सञ्चालनमा आएको छ ।  जिप लाइन केत्तुके बजार माथि रहेको देशकै अग्लो उभिएको बुद्धको मूर्ति भएको स्थानमा राखिएको छ ।

 एकैपटकमा  २ जनाले प्रयोग गर्न सकिने जिप लाइन हिमाली जिल्ला सोलुखुम्बु आउने पर्यटक हरू समेतलाई लक्षित गरि निर्माण गरिएको हो । यसको निर्माणका लागी आफूले करिव ४ वर्ष अघिदेखि पहल गरेको र अहिले आएर सपना सिद्ध भएको अध्यक्ष तामाङको भनाई छ  ।  उहाँले हिमाल हेर्न जाने पर्यटकहरूले राजमार्गमा केही समय गाडी राकेर जिप लाईनको आनन्द लिएर जान सक्ने भएकाले यसले पर्यटन प्रवर्द्धनमा महत्वपुर्ण भूमिका निर्वाह गर्ने बताउनुभयो ।

उद्घाटन कार्यक्रममा प्रदेश सांसद बाबुराम गौतम, सिद्धिचरण नगरपालिकाका मेयर एवं नेपाली कांग्रेस ओखलढुङ्गाका सभापति तेजन खनाल, मानेभञ्ज्याङ गाउँपालिकाका अध्यक्ष ज्ञानेन्द्र रुम्दाली तथा उपाध्यक्ष आश्रचन राई लगायत राजनीतिक दलका प्रमुख एवं प्रतिनिधि तथा स्थानीय लगायतको विशेष उपस्थिति रहेको थियो ।