ओखलढुङ्गाको मोलुङका नागरिकलाई वडाबाटै राष्ट्रिय परिचयपत्र दिइने 

चैत्र ४, सोलुखुम्बु । जिल्ला प्रशासन कार्यालयबाट वितरण हुने राष्ट्रिय परिचयपत्र अव ओखलढुङ्गामा पनि पालिका पालिकाबाटै हुन थालेको छ ।  यस अघि जिल्ला प्रशासन कार्यालय सोलुखुम्बुले पालिका पालिबाबाटै परिचयपत्र वितरण गर्ने व्यवस्था मिलाएसँगै ओखलढुंगामा समेत यस्तो सोवा सुरुवात भएको हो ।

 पहिलो चरणमा ओखलढुङ्गाको मोलुङ गाउँपालिकामा गाउँपालिकाबाट राष्ट्रिय परिचयपत्र वितरण गर्न थालिएको छ । गाउँपालिकाका अध्यक्ष उत्तम  राईको प्रमुख आतिथ्यतामा एक औपचारिक कार्यक्रम गर्दै राष्ट्रिय परिचयपत्र गाउँपालिकाबाटै वितरण गर्न लागीएको जानकारी गराइएको हो । गाउँपालिकामा राष्ट्रिय परिचयपत्र वितरण वडा नम्बर ४ बाट सुरु गरिएको वडा अध्यक्ष भोला राज राईले बताउनुभयो । पहिलो चरणमा मोलुङ ४ हर्कपुरका नागरिकलाई वडाबाटै परिचयपत्र वितरण गरिएको हो ।

 प्रिन्ट भएर आएका १ सय १३ वटा राष्ट्रिय परिचयपत्र वितरण गरि औपचारिक शुभारम्भ गरिएको वडा अध्यक्ष राईले बताउनुभयो । परिचयपत्र वितरण उद्‌घाटन कार्यक्रममा हर्कपुरका वडा सदस्यहरू धनपति दाहाल, मेख बहादुर तामाङ, टिक कुमारी खतिवडा, एम.आइ.एस अपरेटर मदन कुमार के सी, वडा सचिव, शान्तिलाल सापकोटा, कृषि प्राबिधिक विजय धमला मनोसामाजिक परामर्श कर्ता मैयाँ खतिवडा लगायतको उपस्थिति रहेको जनाइएको छ ।