आज विश्व क्षयरोग दिवस, सोलुमा १४ जना क्षयरोगका बिरामी

चैत्र ११, सोलुखुम्बु । आज विश्व क्षयरोग दिवस सोलुखुम्बुमा पनि विभिन्न जनचेतनामूलक कार्यक्रम गरी मनाइएको छ । क्षयरोग रोग विरुद्ध जनचेतना जगाउने, सरल र सहज रूपमा उपचारको प्रबन्ध गर्ने, गराउने उद्देश्यका साथ यो दिवस मनाइएको हो । दिवसको यस वर्षको नारा ‘हो, हामी क्षयरोग अन्त्य गर्न सक्छौं । लगानीको प्रतिबद्धता र सेवा प्रवाहको सुनिश्चतता, आजको आवश्यकता’ भन्ने तय गरिएको छ ।

ग्रामिण क्षेत्रमा बढी क्षयरोगका बिरामी भेटिने भएकाले जिल्ला स्वास्थ्य कार्यालय सोलुखुम्बुले चालु आर्थिक बर्षमा खकार परीक्षण गरी २ सय ३२ जना बिरामीलाई उपचारको दायरामा पुर्याउने लक्ष्य राखेको छ । जिल्ला स्वास्थ्य कार्यालय सोलखुम्बुका क्षयरोग फोकल पर्सन अशोक शिवाकोटीका अनुसारतीन हप्ता वा त्योभन्दा बढी समयदेखि लगातार खोकी लागेमा, खकारमा रगत देखिएमा, श्वास फेर्न गाह्रो भएमा वा छाती भारी भइरहेमा, अकास्मात धेरै तौल घटेमा यस रोग लागेको हुन सक्छ ।

त्यस्तै पसिना आउने धेरै भएर थकान बढी महसुस भएमा नजिकैको स्वास्थ चौकी गएर परीक्षण गर्नुपर्दछ । नेपालमा क्षयरोगको निःशुल्क उपचारको व्यवस्था छ । रोग प्रतिरोधात्मक क्षमता कमजोर भएका मान्छेमा, चुरोट रक्सी या लागूऔषध प्रयोग गर्नेमा र क्षयरोगको औषधिको पूर्ण मात्रा नखाएमा रोगको पुनः संक्रमण फेरि देखिन सक्ने भएकाले उपचारमा विशेष ध्यान दिनुपर्ने उहाँको सुझाव छ । नियमित औषधी खाएमा क्षयरोग निको हुन्छ ।

सन् २०३० सम्ममा क्षयरोग महामारीको अन्त्य र २०५० सम्ममा क्षयरोग मुक्त नेपाल हासिल गर्ने सरकारको लक्ष्य रहेको छ । हरेकबर्ष विश्वमा ८० लाख नयाँ क्षयरोगी थपिन्छन भने २० लाखको क्षयरोगकै कारणले ज्यान जाने गरेको तथ्याङ्क छ ।