रेडियो एभरेष्टको स्टेशन म्यानेजरमा सविन सिंह नियुक्त

जेठ १२, सोलुखुम्बु । एभरेष्ट मिडिया टेक प्रा.लि.ले संचालन गरेको रेडियो एभरेष्ट ९६.८ मेगाहर्जको स्टेशन म्यानेजरमा सविन कुमार सिंह नियुक्त हुनु भएको छ । ‘नेपालकै वेष्ट, रेडियो एभरेष्ट’ भन्ने मुल नाराका साथ २००० (दुई हजार) वाट प्रसारण क्षमतामा शुरु भएको पुर्वी नेपालकै अधिक प्रसारण क्षमताको एफ.एम. स्टेशनको म्यानेजरमा काठमाण्डौका सिंहलाई नियुक्ती गरिएको हो । शनिबार विहान स्टेशनमा आयोजित एक कार्यक्रममा कम्पनीका प्रबन्ध निर्देशक भानुभक्त निरौलाले सिंहलाई नियुक्ती पत्र हस्तान्तरण गर्नु भएको हो । सो अवसरमा कम्पनीका संचालक समिति सचिव अशोक राई र कोषाध्यक्ष गोमा बस्नेतले सिंहलाई नयाँ जिम्मेवारीको शुभकामना दिनु भएको छ ।

२० बर्षदेखि प्रसारण पत्रकारितामा क्रियाशिल सिंहले सन् १९९६ मा रेडियो नेपालको बाल कार्यक्रमबाट आफ्नो करियरको यात्रा शुरु गर्नु भएको थियो । चर्चित रेडियो कार्यक्रम साथी सँग मनका कुरा को कलाकार हुँदै ब्यवस्थापक सम्म बन्नु भएका सिंह विगत १८ बर्षदेखि भने गैर नाफामुलक संचार संस्था ईक्वेल एक्सेस को कार्यक्रम ब्यवस्थापकको रुपमा कार्यरत हुनुहुन्थ्यो ।

त्रिभुवन विश्वविद्यालयबाट समाजशास्त्रमा स्नातकोत्तर गर्नु भएका सिंह सँग नाटक लेखन तथा हास्य ब्यंगको क्षेत्रमा विशेष दख्खल समेत छ । स्टेशन म्यानेजरको जिम्मेवारी लिएपछि सिंहले आफुले हालसम्मको अनुभवको भरपुर सदुपयोग गर्दै रेडियो एभरेष्टलाई उचाईमा पु¥याउने प्रतिबद्धता ब्यक्त गर्नुभयो ।

सोलुखुम्बु सदरमुकाम सल्लेरीमा स्टुडियो रहेको रेडियो एभरेष्टको समुन्द्र सतह देखि ३१५० मिटरको उचाईमा रहेको पत्ताले डाँडामा प्रसारण प्रणाली(टावर) रहेको छ । कोशी प्रदेश, बागमति र मधेस प्रदेशका अतिरिक्त भारतको विहारसम्म यसको प्रसारण पहुँच रहेको छ । रेडियो एभरेष्ट सामाजिक संजालका सबै प्लेटफर्म र अनलाइनमा सहज रुपमा हेर्न र सुन्न सकिन्छ ।