फोटो पत्रकार श्रेष्ठद्वारा एकै याममा ३ पटक सगरमाथा आरोहण गरी विश्व कीर्तिमान

जेठ १२, सोलुखुम्बु । फोटो पत्रकार पूर्णिमा श्रेष्ठले एउटै याममा तीन पटक विश्वको सर्वोच्च शिखर सगरमाथाको आरोहण गरेर विश्व किर्तिमान कायम गर्नुभएको छ । वसन्त ऋतुमा जारी सगरमाथा आरोहणमा उहाँले आज बिहान सगरमाथाको चुचुरोमा तेस्रो पटक पाइला टेकेर विश्व किर्तिमान कायम गर्नुभएको हो ।

पर्यटन विभागको साहसिक पर्यटन तथा पर्वतारोहण शाखाका निर्देशक राकेश गुरुङले आरोही श्रेष्ठले आज बिहान ५ : ५० बजे सगरमाथाको सफल आरोहण गरेको जानकारी दिनुभयो । पत्रकार श्रेष्ठ एउटै याममा तीन पटक सगरमाथा आरोहण गर्ने पहिलो महिला बन्नुभएको छ ।

उहाँले योसहित सगरमाथा आरोहण चौथो पटक आरोहण गर्नुभएको हो । श्रेष्ठले यसअघि यही याममा मे १२ तारिखमा पहिलो पटक तथा मे १९ मा दोस्रो पटक सगरमाथाको सफल आरोहण गर्नुभएको थियो ।