तिब्बती शरणार्थीहरूको परिचयपत्र नवीकरण गर्न जिल्ला प्रशासन पुग्यो थुप्टेन 

बैशाख १३, सोलुखुम्बु । सोलुखुम्बुमा तिब्बती शरणार्थीको शरणार्थी परिचय पत्र नवीकरण गरिएको छ ।  सोलुखुम्बुको सोलुदुधकुण्ड नगरपालिका वडा नम्बर २ मा रहेका तिब्बती शरणार्थीहरूको यस वर्षका लागी परिचयपत्र नवीकरण गरिएको हो ।  जिल्ला प्रशासन कार्यालय सोलुखुम्बुले शरणार्थीहरू रहेको स्थानमै गएर उनीहरूको परिचयपत्र नविकरण गरिदिएको छ ।  

नगरपालिकाको वडा नम्बर २ स्थित थुप्टेन छोलीङ गुम्बामा सरण लिएर बसोबास गरिरहेका १ सय ९५ जना तिब्बती शरणार्थीहरूको परिचयपत्र जिल्ला प्रशासन कार्यालय सोलुखुम्बुका प्रमुख जिल्ला अधिकारी अनोज घिमिरेले बसोबास स्थलमै गएर नवीकरण गरिएको जानकारी दिनुभयो ।

 लामो समय देखी यहाँ बसोबास गर्दै आइरहेका उनीहरूको परिचयपत्र हरेक वर्ष नवीकरण गर्नुपर्ने प्रावधान छ ।  यसरी हरेक वर्ष नवीकरण गर्नका लागी जिल्ला प्रशासन पुग्नु पर्दा कतिपय वृद्ध भइसकेका शरणार्थीहरूलाई समस्या हुने हुँदा प्रशासनले बसोबास स्थलमै आएर सेवा दिएकोमा सहज भएको तिब्बती शरणार्थी राप्टेन लामाले बताउनुभयो ।

 कार्यालयमै आएर सेवा लिन उनिहरुलाई समेत असहज हुने अवस्थालाई हेरेर गुम्बामै आएर परिचयपत्र नवीकरण गरिएको सिडिओ घिमिरेले बताउनुभयो । ३  सय ५० को हाराहारीमा भित्रिएका तिब्बती शरणार्थीहरू हाल घटेर करिव २ सयको हाराहारीमा झरेका छन् ।