घरेलुमा जारी गलैँचा बुनाई तालिम प्रभावकारी भएको सहभागीको भनाई

जेठ १३, सोलुखुम्बु ।  घरेलु तथा साना उद्योग कार्यालय सोलुखुम्बुमा सञ्चालन भइरहेको गलैँचा बुनाई सम्बन्धी तालिम प्रभावकारी भएको सहभागीहरूले बताएका छन् । घरेलु तथा साना उद्योग कार्यालय सोलुखुम्बुको आयोजनामा एक जिल्ला एक उत्पादन कार्यक्रम अन्तर्गत ३ महिने गलैँचा बुनाई सम्बन्धि तालिम प्रभावकारी भएको सहभागीहरूले बताएका हुन् । कार्यालयको चालु आर्थिक बर्ष २०८०-०८१ को एक जिल्ला एक उत्पादन कार्यक्रम अन्तर्गत १२ लाख बजेट विनियोजन गरी महिलाहरुलाई तालिम दिइएको कार्यालयले जनाएको छ  ।

महिलाहरुलाई स्वरोजगार र व्यावसायिक बनाउन तीन महिने गलैँचा बुनाइ तालिम संचालन गरिएको घरेलु तथा साना उद्योग कार्यालय सोलुखुम्बुका सुचना अधिकारी सुनिता राईले जानकारी दिनुभयो । सोलुदुधकुण्ड नगरपालिका वडा नम्बर ९ गोराखानीका फुरी माया तामाङले खाली समयको सदुपयोग गर्न पाउदा तालिम निकै प्रभावकारी भएको बताउनुभएको छ ।

यस्तै थुलुङदुधकोशी गाउँपालिका वडा नम्बर ९ लोखिमका केश माया तामाङले गत चैत्र २२ गते देखि निरन्तर तालिम लिइरहेको उल्लेख गर्नुभएको छ । आफूले सिकेका सिपलाई आगामी दिनहरुमा व्यवहारमा समेत लागु गर्ने बताउनुभएको छ ।

यता सोलुदुधकुण्ड नगरपालिका नम्बर १० टाप्टिङका कोपिला मगरले सदरमुकाममा बालबच्चालाई पढाउनु पर्ने भन्दै दिउँसोको समयमा आफु फुर्सदको समयमा तालिम लिन पाउदाँ खुसी व्यक्त गर्नुभएको छ । तालिममा  जिल्ला भित्रका २२ जना महिलाहरुको सहभागीता रहेको घरेलु तथा साना उद्योग कार्यालय सोलुुखुम्बुले जनाएको छ । उक्त तालिम गत चैत्र २२ गतेबाट सुरु भई ३ महिना सम्म सञ्चालन हुने भएको छ ।