महाकुलुङमा ४ दिने नमुना गाउँसभाको अभ्यास, २६ जना युवाको सहभागिता 

जेठ १४, सोलुखुम्बु ।  सोलुखुम्बुको महाकुलुङ गाउँपालिकामा नमुना गाउँ सभाको अभ्यास गरिएको छ । गत जेठ ११ देखी सुरु आज सम्म गाउँपालिकाका २६ जना युवाको सहभागिता ४ दिने नमुना गाउँसभाको अभ्यास गरिएको हो । नमुना गाउँसभा अभ्यास कार्यक्रममा गाउँपालिकाका छ वटै वडाका १६ देखि २४ वर्ष उमेर समूहका २६ जना युवाहरूलाई गाउँ सभा, रिडिङ पेपर, नीति तथा कार्यक्रम, बजेट वक्तव्य, लोकतन्त्र, युवा नीति, युवा क्लब, युवा सञ्जाल, स्थानीय तहमा योजना तर्जुमाका चरणहरूका बारेमा सिकाइएको थियो ।

त्यस्तै गाउँ सभा पदाधिकारीहरूको भूमिका, विधेयकहरू, निर्वाचन प्रक्रिया, सूचनाको हक, गाउँ सभा सञ्चालन कार्यविधि, युवा जीवनमा मार्गदर्शनको महत्त्व, युवा सम्बन्धी काम गर्ने विभिन्न निकायहरू लगायतका विषयमा प्रशिक्षण दिइएको जिल्ला युवा समिति सोलुखुम्बु का  अध्यक्ष सुजन राई ले जानकारी दिनुभयो । उहाँका अनुसार उक्त कार्यक्रममा नमुना युवा गाउँ सभाको लागि पदाधिकारीहरू निर्वाचन मार्फत चयन भएका थिए ।

अध्यक्षमा गणेश कुलुङ, उपाध्यक्षमा सुमित्रा कुलुङ र प्रमुख प्रशासकीय अधिकृत (सचिव) को भूमिकामा सुजल कुलुङ रहनुभएको उहाँले बताउनुभयो । साथै कार्यक्रमबाट ११ सदस्यीय महाकुलुङ गाउँपालिका स्तरीय युवा क्लब सञ्जाल गठन भएको छ । मनिका कुलुङको नेतृत्वमा ११ सदस्यीय सञ्जाल निर्माण गरिएको हो ।

कार्यक्रमका सहभागीहरूलाई  राष्ट्रिय युवा परिषद्का केन्द्रीय प्रशिक्षक अभिनास कार्कीले प्रशिक्षण दिनुभएको थियो । युवाहरूले स्थानीय शासन प्रक्रियाको बारेमा जानकारी राख्दै स्थानीय सरकारलाई निरन्तर खबरदारी सहितको रचनात्मक सहयोग गर्ने भएकाले यो कार्यक्रमको महत्त्व समेत धेरै रहेको उहाँको भनाई थियो ।

समापन कार्यक्रममा महाकुलुङ  गाउँपालिकाका उपाध्यक्ष विपना कुलुङ,  गाउँपालिकाका सामाजिक विकास समितिका संयोजक पर्खिधन राई वडा अध्यक्षहरु प्रदीप राई ,महल सींह राई निमित्त प्रमुख प्रशासकीय अधिकृत नारायणकाजी बस्नेत, जिल्ला युवा  समिति सोलुखुम्बु  अध्यक्ष सुजन राईलगायतले मन्तव्य राख्नुभएको थियो । कार्यक्रमको सञ्चालन शिक्षा, युवा तथा खेलकुद शाखा प्रमुख झमक बहादुर कटवाल ले गर्नुभएको थियो ।