लुक्लामा फुट ट्रेल निर्माणको काम समय अगावै सम्पन्न

जेठ १४, सोलुखुम्बु । सोलुखुम्बुको खुम्बु पासाङ ल्हामु गाउँपालिकामा लुक्ला बजार पर्यटकीय पूर्वाधार निर्माण आयोजना अन्तर्गत फुट ट्रेल निर्माणका काम सम्पन्न गर्नुपर्ने समय अगावै सम्पन्न भएको छ ।  विश्वकै प्रमुख पर्यटकीय गन्तव्य खुम्बु पासाङ ल्हामु गाउँपालिकामा फुट ट्रेल निर्माणका लागी गत फाल्गुनमा ठेक्का सम्झौता गरेको रिकोर्ट कन्स्ट्रक्सन एण्ड सप्लायर्सले काम सुरु गरेको साढे २ महिनामै काम सम्पन्न गरेको हो ।

निर्माण कम्पनीले गाउँपालिकाको वडा नम्बर २ स्थित तामाङ टोल देखी पासाङ ल्हामु गेट सम्म जिम्मा लिएको १ सय ३७ मिटर लामो फुट ट्रेल निर्माणको काम जेठ अन्तिम सम्म सक्नुपर्ने सम्झौता थियो  । निर्माण कम्पनीले सम्झौता मिति भन्दा १५ दिन अगावै सकेर उदाहरण पेश गरेको हो ।

सहरी विकास तथा भवन निर्माण ओखलढुङ्गाबाट भ्याट बाहेक ८२ लाखमा बोलपत्र आह्वान भएको आयोजनाका लागी त्यसको ४५ प्रतिशत कम अर्थात ५३ लाख ४७ हजार ९ सय ६२ रुपैयाँमा ठेक्का सम्झौता गरेको कम्पनीले सोही रकममा काम सम्पन्न गरेको रिकोर्ट कन्स्ट्रक्सन एण्ड सप्लायर्स प्रालिका प्रतिनिधि धनकुमार तामाङले बताउनुभयो ।

निर्माण कम्पनीले उक्त रकममा फुट ट्रेल, शौचालय जस्ता संरचना निर्माण गरेको छ ।  फुट ट्रेल निर्माणको कामका लागी गत फाल्गुनमा ठेक्का सम्झौता गरि जेठ अन्तिम सम्म सक्नुपर्ने सम्झौता गरेको थियो । पर्यटकको रोजाइमा पर्ने यस क्षेत्रको फुट ट्रेल पूर्वाधार हेर्न लायक भएपछि स्थानीय खुसी व्यक्त गर्छन ।

भौगोलिक कठिनाइका बाबजुद निर्माण कम्पनीले गरेको काम औसतमा राम्रो देखीएको सघन सहरी तथा भवन निर्माण आयोजनाका इन्जिनियर सुदिप दाहालले बताउनुभयो । यस्तै सोही कम्पनीले निर्माणको जिम्मा लिएको ढल व्यवस्थापनको काम समेत सम्पन्न हुने चरणमा रहेको आयोजनाका इन्जिनियर दाहालले बताउनुभयो ।

 भ्याट सहित १ करोड २९ लाखमा सम्झौता गरेको निर्माण कम्पनीले ढल व्यवस्थापनको काम सक्न करिव ४ देखी ५ प्रतिशत मात्र बाँकी रहेको उहाँको भनाई छ ।