सोताङ गाउँपालिकाका अध्यक्ष बस्नेतद्वारा संघीय मन्त्रीहरूसँग भेटघाट : खानेपानी, ऊर्जा, सिंचाई र पूर्वाधारमा जोड

बैशाख २०, सोलुुखुम्बु । सोलुखुम्बुको सोताङ गाउँपालिका अध्यक्ष खिलराज बस्नेतले गाउँपालिकाका प्रमुख पूर्वाधार विकास योजनाहरूलाई प्राथमिकतामा राख्दै संघीय सरकारका सम्बन्धित मन्त्रीहरूसँग महत्वपूर्ण भेटवार्ता गर्नुभएको छ । अध्यक्ष बस्नेतले खानेपानी तथा सरसफाइ मन्त्री प्रदीप यादवसँगको भेटमा सोताङ गाउँपालिका वडा नं. १, ३, ४ र ५ लाई समेटेर निर्माण गरिने बृहत खानेपानी आयोजनाका लागि बजेट व्यवस्थापन गर्न आग्रह गर्दै माग निवेदन प्रस्तुत गर्नुभएको थियो।

उहाँले उक्त आयोजना ‘एक घर एक धारो’ अवधारणाअनुसार केन्द्रीय खानेपानी आयोजनाबाट स्वीकृत भई मन्त्रालयमा पेश भइसकेको (विस्तृत परियोजना प्रतिवेदन) अनुसार कार्यान्वयन गर्नुपर्ने आवश्यकता औंल्याउनुभयो । मन्त्री यादवसँगको भेटका क्रममा अध्यक्ष बस्नेतले लिन्जिखर्क र चिस्यानी सिगानी मुहानको स्थलगत निरीक्षण समेत गर्नुभएको थियो । त्यसैगरी, उर्जा, जलस्रोत तथा सिंचाई मन्त्री दीपक खड्कासँगको भेटमा अध्यक्ष बस्नेतले मन्त्रालयबाट तोक भइसकेको १३२ केभीए सव–स्टेसन निर्माण कार्य तत्काल अगाडि बढाउन र प्रस्तावित डीप बोरिङ सिंचाई आयोजनाका लागि बजेट विनियोजन गर्न माग गर्नुभएको छ ।

साथै, पूर्व अर्थमन्त्री तथा वर्तमान प्रधानमन्त्रीका आर्थिक सल्लाहकार डा. युवराज खतिवडासँगको भेटमा अध्यक्ष बस्नेतले राष्ट्रिय महत्त्वका विषयहरूमा ध्यानाकर्षण गराउनुभएको छ । उहाँले देशभरका पालिकाहरूलाई जोड्ने सडक कालोपत्रे गर्ने, महाकुलुङ गाउँपालिका हुँदै जाने सडक, भोजपुर–उदयपुर–सुनसरी–सोलुखुम्बु–ओखलढुंगा जोड्ने सडकलाई केन्द्रीय सडकको सूचीमा राख्नुपर्ने, दिप्लिघाट पुल संरक्षण तथा खानेपानी आयोजना लगायतका विषयमा विस्तृत छलफल गर्नुभएको थियो ।

छलफलका क्रममा सल्लाहकार खतिवडाले विदेशीक दातृ निकायहरूको सहयोग, मुलुकको समग्र आर्थिक अवस्था र आगामी रणनीतिहरूबारे संक्षिप्त जानकारी दिनुहुँदै अध्यक्ष बस्नेतद्वारा उठाइएका मागहरू अत्यन्तै सान्दर्भिक रहेको बताउँदै शीघ्र पहल गर्ने प्रतिबद्धता व्यक्त गर्नुभएको थियो । यसरी अध्यक्ष बस्नेतको संघीय नेतृत्वसँगको भेटले सोताङ गाउँपालिकाका दीर्घकालीन विकास योजनाहरूको कार्यान्वयनमा सकारात्मक प्रभाव पर्ने अपेक्षा गरिएको छ ।