सोलुखुम्बुमा स्वास्थ्य प्रवद्र्धनका लागि योगाभ्यास कार्यक्रम सुरु

बैशाख २१, सोलुखुम्बु । सोलुखुम्बुमा नागरिकको स्वास्थ्य प्रवद्र्धन, रोग न्यूनीकरण तथा दीर्घायु जीवनयापनको उद्देश्यले योगाभ्यास कार्यक्रम सुरु गरिएको छ । जिल्ला आयुर्वेद स्वास्थ्य केन्द्र सोलुखुम्बुको आयोजनामा आइतबारदेखि योङ स्टार क्लबमा औपचारिक रूपमा कार्यक्रम सुरु भएको हो । स्वस्थ जीवनशैलीको विकास, मानसिक तथा शारीरिक सन्तुलनमा सुधार, रोग प्रतिरोधात्मक क्षमताको अभिवृद्धि र नसर्ने रोगहरूको न्यूनीकरण गर्न योग अभ्यास अत्यन्त उपयोगी रहेको कार्यक्रम आयोजकहरूले बताएका छन् ।

कार्यक्रम बारे बोल्दै जिल्ला आयुर्वेद स्वास्थ्य केन्द्र सोलुखुम्बुका प्रमुख अमिन्द्र कुमार पण्डितले अहिलेको व्यस्त जीवनशैलीमा योग अत्यावश्यक अभ्यास भएको बताउनुभयो । उहाँले योगले शरीर मात्र होइन, मनलाई पनि स्वस्थ राख्ने बताउनुभयो । त्यस्तै योग गुरु खिलानाथ बास्तोलाले अस्वस्थ जीवनशैली र अव्यवस्थित खानपानका कारण मानिसहरू रोगी बन्दै गएका उल्लेख गर्दै योगमार्फत रोगबाट मुक्ति सम्भव हुने धारणा व्यक्त गर्नुभयो ।

कार्यक्रममा कोशी प्रदेशका पूर्व मन्त्री बुद्धि कुमार राजभण्डारी, जिल्ला समन्वय समिति प्रमुख कृष्ण प्रसाद निरौला, जिल्ला न्यायाधीश चन्द्र कुमार पोख्रेल, प्रमुख जिल्ला अधिकारी अनोज कुमार घिमिरे, योङ स्टार क्लबका अध्यक्ष बुद्धि नारायण श्रेष्ठ लगायत ७० देखि ८० जनासम्मको सहभागिता रहेको सूचना अधिकारी केशव ढुंगनाले जानकारी दिनुभयो । स्वास्थ्य क्षेत्रमा जनचेतना अभिवृद्धि गर्न तथा योग अभ्यासलाई समुदायस्तरमा विस्तार गर्न कार्यक्रमले सहयोग पु¥याउने अपेक्षा गरिएको छ ।