ओखलढुंगामा बच्चा जन्माएर फालेको आरोपमा युवती पक्राउ

बैशाख २१, सोलुखुम्बु ।  ओखलढुंगामा नवजात शिशु जन्माएर फालेको आरोपमा एक १९ वर्षीया युवती पक्राउ परेकी छन् । चम्पादेवी गाउँपालिका–९ की ती युवतीले आफ्नै घरमा बच्चा जन्माएर नजिकैको अर्को घरमा फालेको आरोपमा पक्राउ परेकी हुन् । प्रहरीका अनुसार युवतीले गत वैशाख १४ गते नवजात शिशुको जन्म दिएपछि शिशुलाई नजिकैको घरमा फालेकी थिइन् । उक्त शिशुलाई कुकुरले खाइरहेको देखेपछि स्थानीयवासीले प्रहरीलाई खबर गरेका थिए ।

घटनाको जानकारी पाएपछि ईलाका प्रहरी कार्यालय रामपुर बरुणेश्वरबाट प्रहरी निरीक्षक मनिष लुईटेलको नेतृत्वमा टोली घटनास्थलमा पुगेको थियो ।प्रहरी टोलीले घटनास्थलबाट शिशुको टाउको मात्र फेला पारेको जानकारी दिएको छ । प्रहरीको प्रारम्भिक अनुमान अनुसार शिशुको शरीरको अन्य भाग कुकुरले खाएको हुन सक्ने आशंका गरिएको छ । घटनापछि प्रहरीले खोजी कार्य अघि बढाउँदै आइतबार बिहान युवतीलाई सुनकोशी गाउँपालिका–७ च्यानमबाट पक्राउ गरेको हो ।

जिल्ला प्रहरी कार्यालय ओखलढुङ्गाका सूचना अधिकारी प्रहरी निरीक्षक विजय कार्कीका अनुसार घटनाबारे थप अनुसन्धान भइरहेको छ । प्रारम्भिक अनुसन्धानमा शिशु जन्मिएपछि तुरुन्तै फालिएको देखिएको प्रहरीले जनाएको छ ।