धनकुटा अस्पतालमा हेमोडायलाइसिस सेवा सुरु, साना पहाडी जिल्लाका बिरामीलाई राहत

बैशाख २१, सोलुखुम्बु । धनकुटा जिल्ला अस्पतालमा स्थापना भएको १११ वर्षपछि पहिलोपटक हेमोडायलाइसिस सेवा सुरु गरिएको छ । वि.सं. १९७० मा स्थापना भएको अस्पतालमा आइतबार एक विशेष कार्यक्रममा कोसी प्रदेशका स्वास्थ्यमन्त्री भूपेन्द्र राईले सेवा औपचारिक रूपमा शुभारम्भ गर्नुभयो ।

१५ शय्याको अस्पतालमा सुरु गरिएको यस सेवाबाट सुरुवाती चरणमा हप्तामा १२ बिरामीले उपचार पाउने छन् । अस्पताल प्रशासनका अनुसार सेवा दुई सिफ्टमा सञ्चालन गर्दा २४ जनासम्म लाभान्वित हुने अपेक्षा गरिएको छ । यसबाट कोसी पहाडका धनकुटा, तेह्रथुम, भोजपुर र सङ्खुवासभा जिल्लाका बिरामीले राहत पाउनेछन्। अस्पतालका प्रमुख मेडिकल सुपरिटेन्डेन्ट डा. सन्तोष राईले स्थानीय बिरामीका लागि अब उपचार सहज र सुलभ हुने जानकारी दिनुभयो ।

उद्घाटन समारोहमा मन्त्री राईले सेवा प्रभावकारी बनाउन सबै पक्षबीच समन्वय आवश्यक रहेको बताउँदै अस्पताललाई ५० वा १०० शय्यामा विस्तार गर्ने विषयमा छलफल भइरहेको जानकारी दिनुभयो । साथै, चाँडै सघन उपचार कक्ष (आईसीयू) सेवा पनि सुरु गरिने घोषणा गर्नुभयो। धनकुटा नगरपालिका मेयर चिन्तन तामाङले हेमोडायलाइसिस सेवा खर्चिलो भएकाले यसबाट धेरै बिरामीलाई राहत पुग्ने धारणा राख्नुभयो । अस्पताल व्यवस्थापन समितिका अध्यक्ष निरन तामाङले जनशक्ति अभावलाई चुनौतीका रूपमा औंल्याउँदै मन्त्रालयबाट थप सहयोग अपेक्षित रहेको बताउनुभयो ।