सप्तेश्वर पूर्ण खोप सुनिश्चितता वडा घोषणा

बैशाख २१, सोलुखुम्बु । केपिलासगढी गाउँपालिका–५, सप्तेश्वर वडालाई “पूर्ण खोप सुनिश्चितता वडा” घोषणा गरिएको छ । एक विशेष कार्यक्रममा वडामा बसोबास गर्ने सबै लक्षित उमेर समूहका बालबालिकाहरूले राष्ट्रिय खोप कार्यक्रमअन्तर्गत पर्ने सम्पूर्ण खोप सेवा प्राप्त गरिसकेको औपचारिक घोषणा गरिएको हो ।

गाउँपालिका अध्यक्ष समिर राई, स्वास्थ्य शाखाका प्रतिनिधिहरू, स्थानीय जनप्रतिनिधि, स्वास्थकर्मी र बासिन्दाहरूको सहभागितामा आयोजित उक्त कार्यक्रममा सप्तेश्वर वडाले खोप सुनिश्चितताको मापदण्ड पुरा गरेको भन्दै गाउँपालिकाले प्रशंसा गरेको छ । स्वास्थ्य शाखा प्रमुखका अनुसार, वडाका सबै १५ महिना मुनिका बालबालिकाले नियमित खोप प्राप्त गरिसकेको वडा अध्यक्ष हिमाल भक्त राईले बताउनुभयो । यस उपलब्धिमा स्थानीय स्वास्थ्य संस्था, महिला स्वास्थ्य स्वयंसेविका, आमाबुबा र समुदायको सक्रिय सहभागिता महत्वपूर्ण रहेको बताइएको छ ।

पूर्ण खोप सुनिश्चितता वडाको घोषणा सँगै अन्य वडाहरूलाई पनि यस अभियानमा सहभागी गराउँदै लैजाने योजना गाउँपालिकाले बनाएको छ । स्वास्थ्य क्षेत्रमा यो उपलब्धिले बालबालिकालाई मृत्युबाट जोगाउन र स्वास्थ्य सुनिश्चित गर्न सहयोग पुग्ने जनाइएको छ ।