खुम्बु पासाङल्हमुको सार्वजनिक सुनुवाई सम्पन्न, व्यवस्थित हिमाली सहर निर्माण गर्ने अध्यक्ष मिङ्माछिरीको प्रतिबद्धता

बैशाख २०, खुम्बु ।  खुम्बु पासाङल्हमु गाउँपालिकाको चालु आर्थिक वर्षको सार्वजनिक सुनुवाई सम्पन्न भएको छ । पालिका अध्यक्ष मिङमा छिरी शेर्पाको अध्यक्षतामा आइतबार गाउँपालिकाको वडा नम्बर २ मुसे स्थित सामुदायिक भवनमा सम्पन्न सार्वजनिक सुनुवाइ कार्यक्रममा चैत्र मसान्तसम्म पालिकाबाट भएका विकास निर्माण र सेवा प्रवाहको अवस्था बारे जानकारी गराइएको छ । 

कार्यक्रममा प्रमुख प्रशासकीय अधिकृत नवराज गौतमले चालु आर्थिक वर्षमा ७५ करोड ४५ लाखको बजेट निर्माण भएकोमा पुँजीगत तर्फ ३८ करोड ५ लाख र चालु तर्फ ३७ करोड ४० लाख बजेट विनियोजन भई काम भइरहेको जानकारी दिनुभयो । हालसम्म चालु तर्फ ५१ प्रतिशत र पुँजीगत तर्फ १६ प्रतिशत खर्च भएको जानकारी दिनुभयो । वहाँले कार्यालयबाट विषयगत रुपमा प्रवाह भएका सेवाको विवरण समेत प्रस्तुत गर्नु भएको छ । 

रेडियो एभरेष्टको सहजिकरणमा भएको सुनुवाइमा नागरिकले उठाएका प्रश्नको जवाफ दिँदै पालिका अध्यक्ष मिङमा छिरी शेर्पाले आफू जनतासँगै हातेमालो गरेर अगाडि बढेको भन्दै समानुपातिक ढङ्गले पालिकाको विकास भइरहेको बताउनु भयो । सुर्केसम्म बाटो ल्याइसकेको भन्दै अध्यक्ष शेर्पाले अब लुक्ला र पालिका केन्द्र चौरीखर्कमा चाँडै सडकको पहुँच पु¥याउने गरि डिपिआर तयार भइसकेको बताउनु भयो । साथै वहाँले लुक्ला र चौरीखर्कको क्षेत्र समेटेर व्यवस्थित हिमाली शहर निर्माण गर्ने प्रतिबद्धता व्यक्त गर्नु भयो । विश्वको सर्वोच्च शिखर सगरमाथा रहेको पालिकामा पर्यटकीय क्षेत्रको पूर्वाधार निर्माण र डिजिटल नेटवर्क निर्माण स्थानीय सरकारको प्राथमिकता रहेको अध्यक्ष शेर्पाको भनाई छ । कार्यवाहक उपाध्यक्ष तथा कार्यपालिका सदस्य लाक्पा ग्याल्जेन शेर्पाले स्वागत मन्तव्य राख्दै पालिकाको सिङ्गो टिम विकासका कार्यमा लागि परेको बताउनु भयो । 

२ नम्बर र ३ नम्बर वडा कार्यालय सहितको संयुक्त सार्वजनिक सुनुवाइ कार्यक्रममा २ वटै वडा अध्यक्षले आ–आफ्नो वडाको प्रगति प्रतिवेदन पेश गर्नुभएको थियो । २ नम्बर वडा अध्यक्ष आङ्ग फुर्वा शेर्पा र ३ नम्बर वडा अध्यक्ष नुरू जाङ्वु शेर्पाले जनताहरूलाई प्रगति विवरण पेश गर्नु भएको छ । 

सोही अवसरमा इलाका प्रहरी कार्यालय नाम्चेका प्रहरी निरिक्षक रोशन खड्काले पालिका भरिको शान्तिसुरक्षाको अवस्था बारे अवगत गराउनु भएको थियो । सुनुवाइकै क्रममा पालिकाका इन्जिनियर दिपकुमार बस्नेतले सुर्के लुक्ला र सुर्के चौरीखर्क सडक निर्माणको डिपिआर र सव इन्जिनियर प्रवीना बुढाथोकीले लुक्लामा बन्न लागेको फोहोर मैला व्यवस्थापन सम्बन्धी इकाईको डिपिआर प्रस्तुत गर्नु भएको थियो ।