सोलुखुम्बुमा मानव अधिकारप्रति जनचेतना जगाउने प्रयास

बैशाख २२, सोलुखुम्बु । हिमाली जिल्ला सोलुखुम्बुमा मानव अधिकारको चेतना अभिवृद्धि गर्ने उद्देश्यले मानव अधिकार शिक्षा प्रशिक्षण कार्यक्रम सम्पन्न भएको छ । नेपाल मानव अधिकार शिक्षा समाज र नेपाल मानव अधिकार संगठनको संयुक्त आयोजनामा सोमबार सल्लेरीमा एकदिने तालिम दिइएको हो ।

कार्यक्रमले मानव अधिकारका सन्दर्भमा विभिन्न क्षेत्रका सरोकारवालाहरूलाई सुसूचित गराउने लक्ष्य लिएको नेपाल मानव अधिकार संगठन सोलुखुम्बुले जनाएको छ। कार्यक्रममा बोल्दै संगठनका केन्द्रिय समितिका तालिम विभाग प्रमुख प्रा.डा. गोबिन्दप्रसाद ढकालले देशभर मानव अधिकार उल्लंघनका घटना बढ्दो क्रममा रहेको बताउनुभयो। उहाँले यस्ता कार्यक्रमले नागरिकमा चेतना फैलाउने र अधिकारको संरक्षणमा सशक्त भूमिका खेल्ने विश्वास व्यक्त गर्नुभयो ।

सो अवसरमा सोलुदुधकुण्ड नगरपालिकाका मेयर नाम्गेल जाङ्बु शेर्पाले गाउँ–गाउँमा पुगेर यस्ता कार्यक्रम सञ्चालन गर्न संघसंस्थाहरूलाई आग्रह गर्नुभयो। उहाँले मानव अधिकारसम्बन्धी शिक्षाले समाजमा सकारात्मक परिवर्तन ल्याउने बताउँदै नागरिक सशक्तीकरणमा यस्ता प्रशिक्षणले महत्त्वपूर्ण योगदान पु¥याउने धारणा राख्नुभयो ।

तालिममा प्रा.डा. गोबिन्दप्रसाद ढकाल र बरिष्ठ अधिवक्ता विनोद कार्कीले लोकतन्त्र र मानव अधिकारको विषयमा सहभागीहरूलाई प्रशिक्षण दिनुभयो। कार्यक्रममा नेपाली सेना, नेपाल प्रहरी, सशस्त्र प्रहरी, पत्रकार, विद्यार्थी लगायत विभिन्न क्षेत्रका प्रतिनिधिहरूको उल्लेखनीय उपस्थिति रहेको थियो । यस्ता कार्यक्रमहरू निरन्तर सञ्चालन गर्दै जानुपर्ने आवश्यकता महसुस गरिएको आयोजक संस्थाहरूले बताएका छन् ।