बैशाख २२, सोलुखुम्बु । ओखलढुङ्गाको खिजीदेम्बा गाउँपालिका–८ स्थित भुसिंगामा करेन्ट लागेर एक युवकको ज्यान गएको छ। कैलाली जिल्लाको पूर्व हसुलिया गाविस निवासी ३० वर्षीय बिन्दु चौधरीको शनिबार दिउँसो करेन्ट लागेर घटनास्थलमै मृत्यु भएको हो। चौधरी काठमाडौंस्थित सिग्माकोण प्रालिमा कार्यरत थिए।
उक्त कम्पनीले ठेक्कामार्फत भुसिंगास्थित रावा टोलमा ट्रान्सफर्मर जडानको जिम्मा लिएको थियो। ट्रान्सफर्मर चार्ज गर्ने क्रममा करेन्ट लागेर चौधरीको ज्यान गएको जिल्ला प्रहरी कार्यालय ओखलढुङ्गाका सूचना अधिकारी प्रहरी निरीक्षक विजय कार्कीले जानकारी दिनुभयो ।
घटनाको जानकारी प्राप्त भएपछि इलाका प्रहरी कार्यालय बरुणेश्वर रामपुरबाट प्रहरी निरीक्षक मनिष लुइँटेलको नेतृत्वमा प्रहरी टोली घटनास्थल पुगेको बताइएको छ। हाल घटनाबारे थप अनुसन्धान भइरहेको प्रहरीले जनाएको छ। यस दुःखद घटनाले निर्माण कार्यमा सुरक्षा मापदण्डको महत्वलाई पुनः स्मरण गराएको छ।
Discussion about this post