नेचासल्यानका राईसहित ६ जना लागुऔषधसहित पक्राउ

बैशाख २२, सोलुखुम्बु । सोलुखुम्बुको नेचासल्यानका एक युवकसहित ६ जना लागुऔषधसहित पक्राउ परेका छन् । मोरङ र झापाको विभिन्न स्थानहरुमा प्रहरीको विशेष अभियान क्रममा उनीहरूलाई पक्राउ गरिएको हो । मोरङको विराटनगर महानगरपालिका–१६ बाट लागुऔषध नियन्त्रण ब्यूरो विराटनगर र इलाका प्रहरी कार्यालय रानीको संयुक्त टोलीले सोलुखुम्बु नेचासल्यान गाउँपालिका–५ का ३० वर्षीय दीपक राईलाई ६ ग्राम ९० मिलिग्राम ब्राउन सुगरसहित नियन्त्रणमा लिएको छ ।

सोही कारवाहीमा झापा कमल गाउँपालिका–५ का २५ वर्षीय समिर सुब्बा र सुजन सुब्बालाई २ ग्राम ९ मिलिग्राम ब्राउन सुगरसहित पक्राउ गरिएको हो । यसैगरी मोरङ उर्लाबारी–३ का २३ वर्षीय आशिष राईलाई इलाका प्रहरी कार्यालय उर्लाबारीको टोलीले प्रतिबन्धित औषधी ट्रामाडोल र डायोसी ३१० क्याप्सुलसहित पक्राउ गरेको छ ।

त्यस्तै झापा गौरादह नगरपालिका–१ बेलडागीस्थितबाट ३४ वर्षीय रोमन अधिकारी र कमल गाउँपालिका–७ का २० वर्षीय पवन दाहाललाई ३ ग्राम ब्राउन सुगरसहित इलाका प्रहरी कार्यालय गौरादहको टोलीले नियन्त्रणमा लिएको हो । पक्राउ परेका सबै व्यक्तिहरूलाई आवश्यक कानुनी कारवाहीका लागि अनुसन्धान अघि बढाइएको प्रहरीले जनाएको छ ।