धनकुटामा बस दुर्घटनाः एक वृद्धाको मृत्यु, १३ जना घाइते

बैशाख २२, सोलुखुम्बु । कोशी लोकमार्गअन्तर्गत धनकुटा नगरपालिका–६ गोठगाउँमा यात्रुवाहक बस दुर्घटना हुँदा एक जनाको मृत्यु भएको छ भने १३ जना घाइते भएका छन् । धरानबाट भोजपुरतर्फ जाँदै गरेको को १ ख २१७७ नम्बरको बस अनियन्त्रित भई बिहान दुर्घटना भएको हो ।

दुर्घटनामा धनकुटा–६ की ७३ वर्षीया कृष्णकुमारी राई भुजेल गम्भीर घाइते भइ उपचारका लागि जिल्ला अस्पताल धनकुटा लगिएकोमा उपचारकै क्रममा उनको मृत्यु भएको जिल्ला प्रहरी कार्यालय धनकुटाका प्रहरी नायब उपरीक्षक (डीएसपी) ओमप्रकाश खनालले जानकारी दिनुभयो ।

घाइतेमध्ये केहीको उपचार धरानस्थित बीपी कोइराला स्वास्थ्य विज्ञान प्रतिष्ठानमा, भने केहीको जिल्ला अस्पताल धनकुटामै भइरहेको प्रहरीले जनाएको छ । बस कसरी अनियन्त्रित भयो भन्ने विषयमा अनुसन्धान भइरहेको छ ।