संखुवासभामा २ सय कुकुरको निःशुल्क बन्ध्याकरण, रेबिज नियन्त्रणमा टेवा

बैशाख २२, सोलुखुम्बु । संखुवासभाको चैनपुर नगरपालिकामा सामुदायिक तथा घरपालुवा कुकुरको निःशुल्क बन्ध्याकरण तथा रेबिजविरुद्धको खोप लगाउने अभियान सञ्चालन गरिएको छ । चैनपुर नगरपालिकाको आयोजना र नेपाल एग्री लाइभस्टक ट्रेनिङ एण्ड रिसर्च सेन्टर, इटहरीको प्राविधिक सहयोगमा तीन दिनसम्म सञ्चालन भएको शिविरमा कुल २०१ कुकुरको बन्ध्याकरण गरिएको हो ।शिविरमा १२० वटा डाँगो र ८१ वटा पोथी कुकुरको बन्ध्याकरण गरिएको चैनपुर नगरपालिका पशु सेवा शाखाका नायव पशु सेवा प्राविधिक प्रकाश ढुङ्गानाले जानकारी दिनुभयो ।

तीमध्ये १५८ कुकुर छाडा तथा ४३ घरपालुवा थिए । ढुङ्गानाका अनुसार, रेबिज एक प्राणघातक जुनोटिक रोग भएकाले यसको रोकथाम र नियन्त्रणका लागि यस्तो शिविर सञ्चालन गरिएको हो । नेपालले सन् २०३० सम्ममा रेबिज उन्मूलन गर्ने लक्ष्य लिएको छ । विश्वभर हरेक वर्ष करिब ६० हजार मानिसको मृत्यु रेबिजका कारण हुने तथ्याङ्क छ ।

रेबिज संक्रमित पशुको टोकाइबाट मानिसमा सर्ने हुँदा यस रोगको नियन्त्रण अत्यन्त जरूरी रहेको विज्ञहरू बताउँछन्। नगरपालिकाले आगामी दिनमा पनि यस्ता कार्यक्रमलाई निरन्तरता दिने बताएको छ ।