रुभुङमा साकेला सिली प्रदर्शनी सम्पन्न, ७ टिमको सहभागिता (हेर्नुस तस्वीर सहित)

जेठ १५ सोलुखुम्बु । खोटाङको रावाबेसी गाउँपालिकामा साकेला सिली प्रदर्शन कार्यक्रम सम्पन्न भएको छ । मङ्गलबार रुभुङ सुम्नीमा साकेला सिली व्यवस्थापन समितिको आयोजनामा किराँत राईहरूको महान चाड उँधौलीको साकेला सिली किराँत यलेदुङ सम्वत् ५ हजार ८४ अवसरमा साकेला सिली प्रदर्शनी सम्पन्न भएको हो ।

रावाबेसी गाउँपालिकाका अध्यक्ष फट्टिक कुमार श्रेष्ठको प्रमुख आथित्यतामा सम्पन्न कार्यक्रममा जिल्लाका विभिन्न स्थानका ७ टिमले सहभागिता जनाएका थिए । सहभागि टिमले किराँत राईहरूको सांस्कृतिक पहिरन र साकेला गीतमा सिली प्रदर्शन गरेको संवाददाता उदिम चाम्लीङले जानकारी दिनुभयो ।

कार्यक्रममा आयोजक रुभुङ सुम्नीमा साकेला व्यवस्थापन समिति, नव प्रतिभा सांस्कृतिक समाज, किराँत साकेला समाज कुभिण्डे, किराँत साकेला समाज दम्कु, जालपा मावि नुनथला र दिक्तेल रूपाकोट मझुवागढी नगरपालिका १३ नुनथलाको २ टिमले सांस्कृतिक साकेला सिली नाच प्रदर्शन गरेको छ ।

कार्यक्रमलाई शुभकामना व्यक्त गर्दै विशेष अतिथि तथा गाउँपालिका उपाध्यक्ष कौशिला गुरुङले रुभुङको विकासको लागी गाउँपालिकाको तर्फबाट निम्ती सक्दो सहयोग गर्ने बताउनु भएको छ । यस्तै रावाबेसी गाउँपालिका वडा नम्बर २ का वडा अध्यक्ष डोलराज बस्नेतले पालिकाबाट विनियोजन गरेको रकममा थप गरेर पनि वडाको सांस्कृतिक विकासमा लगानी गर्ने प्रतिबद्धता व्यक्त गर्नुभएको छ ।

कार्यक्रममा किराँत राई यायोक्खा रावाबेसी अध्यक्ष विशाल राई, नेपाली कांग्रेस खार्पा वडा सभापति भक्त राज राई, नेकपा एमालेका प्रतिनिधि हरि भुजेल, माओवादी केन्द्रका वडा अध्यक्ष सेतुमान राई, रेडियो एभरेष्टका सञ्चालन समिति सचिव पत्रकार अशोक राई लगायत स्थानीय जनप्रतिनिधि, प्रहरी तथा शिक्षक र स्थानीय हरुको उपस्थिति रहेको थियो ।