केपिलासगढीले कृषि, जडीबुटी शैक्षिक प्रदर्शनी मेला गर्ने 

जेठ १, सोलुखुम्बु ।  खोटाङको केपीलासगढी गाउँपालिकाले कृषि, जडिबुटी, शैक्षिक मेला एवं साकेला नाच प्रदर्शनी गर्ने भएको छ । गाउँपालिकाले कृषिजन्य उपजको प्रवर्द्धन गर्ने हेतुले आगामी जेठ ७ गते उक्त कार्यक्रम आयोजना गर्न लागेको हो ।  केपीलासगढी गाउँपालिका, सिर्जनशील भरिया समाज र जि फाउण्डेसनको संयुक्त आयोजनामा गाउँपालिकाले कृषि प्रदर्शनी, जडीबुटी प्रदर्शनी तथा अन्य विभिन्न कार्यक्रम गर्ने भएको हो ।  

उक्त मेलामा कृषकले आफैले उत्पादन गरेको मकै, गहुँ, काउली बन्दा, गाजर, रायोको साग, गोलभेडा, फर्सि, आलु, भिण्डी, लगायत तेलहन, दलहन, फलफुल, मसला, रैथाने बालीहरु, कोसेबाली, मौरी लगायतको कृषि प्रदर्शनी गर्न लागेको हो ।  यस्तै जडीबुटी तर्फ ओखर, आतिस, सखुवा, पाखनवेद, धसिङ्ग्रे, निम, टिमुर, अमला, रिठ्ठा, मजिटो, जटामसी, सुगन्धवाल, गुर्जो, लालीगुँरास, तेजपात, कुट्की, चिराइतो, बोझो, कुरिलो, लोक्ता, सुनाखरी र तितेपाती लगायतको प्रदर्शनी हुने गाउँपालिकाले जनाएको छ ।

यस्तै शैक्षिकमेला प्रदर्शनी तर्फ हस्तकला, चित्रकला, विज्ञान प्रदर्शनी, स्टेज सो र एसइई पछि के ? जस्ता विषयहरूको प्रदर्शनी तथा छलफल हुने गाउँपालिकाका प्रमुख प्रशासकीय अधिकृत सौ धन राईले जानकारी दिनुभयो ।  गाउँपालिकाले कृषि क्षेत्रको विकास र प्रवर्द्धनमा विभिन्न काम गरिरहेको भएपनि उचित मूल्याङ्कनमा पर्न असफल भइरहेको भन्दै गाउँपालिका अध्यक्ष समिर राईले यो प्रदर्शनीले केही हद सम्म किसानहरूको उत्पादनको मुल्याङ्न हुने बताउनुभएको छ । यस्तै विद्यार्थीहरूको कला कुशलताको  वृद्धि गर्दै उनीहरूको बौद्धिकतालाई प्रवर्द्धन गर्नका लागी शैक्षिक मेलाको आयोजना गर्ने निर्णय भएको पनि उहाँले बताउनुभयो ।