सोलुखुम्बुबाट सुत्केरी महिला र नवजात शिशुको हेलीकप्टरमार्फत उद्धार

जेठ २, सोलुखुम्बु । सोलुखुम्बुको खुम्बु पासाङ ल्हमु गाउँपालिका–४ की एक सुत्केरी महिला र नवजात शिशुको नेपाली सेनाको हेलीकप्टरमार्फत उद्धार गरिएको छ । २७ वर्षीया अनमिता कुलुङले बिहीबार दिउँसो छोरालाई जन्म दिनुभएको थियो तर नवजात शिशुलाई श्वासप्रश्वासमा समस्या देखिएपछि तत्काल उपचारका लागि नेपाली सेनाको हेलीकप्टरमार्फत राजधानी काठमाडौं पठाइएको जिल्ला अस्पताल फाप्लुले जनाएको छ ।

यो उद्धार राष्ट्रपति महिला उत्थान कार्यक्रम अन्तर्गत गरिएको हो । सो कार्यक्रमले दुर्गम तथा जोखिमपूर्ण क्षेत्रका गर्भवती र सुत्केरी महिलालाई आवश्यक परेमा हवाईमार्गबाट उद्धार गर्ने व्यवस्था मिलाएको छ । उद्धार कार्य जिल्ला प्रशासन कार्यालयको समन्वयमा गरिएको प्रमुख जिल्ला अधिकारी अनोज कुमार घिमिरेले जानकारी दिनुभयो ।

दुर्गम तथा स्वास्थ्य सेवामा पहुँच कम भएका क्षेत्रका महिलालाई सुरक्षित मातृत्व सेवा उपलब्ध गराउने उद्देश्यले यो कार्यक्रम सञ्चालनमा ल्याइएको हो । सुत्केरी महिला र नवजात शिशुको स्वास्थ्य अवस्थाबारे थप जानकारी आउन बाँकी रहेको जिल्ला अस्पताल फाप्लुले जनाएको छ ।