नेचासल्यानमा रोपियो १३ सय सल्लो र चाँप 

जेठ १६, सोलुखुम्बु । सोलुखुम्बुको नेचासल्यान गाउँपालिकामा १ हजार ३ सय बृक्षरोपण गरिएको छ । गणतन्त्र दिवसको अवसर पारेर डिभिजन वन कार्यालयको आयोजनामा गाउँपालिकाको वडा नम्बर १ स्थित गिम्बीर जडेनी सामुदायिक वनमा १ हजार ३ सय बोट चाँप र पात्ले सल्ला २ प्रजाति वृक्षरोपण गरिएको कार्यालयले जनाएको छ ।  

मंगलबार र बुधबार आज गरि सामुदायिक वनका विभिन्न ठाउँहरूमा उक्त बिरुवा रोपिएको वन अधिकृत अशोक कुमार जैसवालले जानकारी दिनुभयो । यसैगरी विहीबार नेचासल्यान गाउँपालिका स्थित भुमेस्वरी माविमा वृक्षारोपण गरिने जनाइएको छ ।  

हरियाली विद्यालय कार्यक्रम अन्तर्गत भोलि उक्त विद्यालयमा जापानिज धुपी र मयुरपङ्खी का १ सय बोट बिरुवा रोपिने वन अधिकृत जैसवालले जानकारी दिनुभयो । यस्तै डिभिजन वन कार्यालयको आयोजनामा जिल्लाका अन्य विभिन्न सरकारी कार्यालयहरुमा समेत वृक्षरोपण गरिएको छ ।

मंगलबार दिवसको अवसर पारेर जिल्ला प्रहरी कार्यालय परिसरमा जापानिज धुप्पी र मयुरपङ्खी रोपिएको थियो । यस्तै दुर्गा बक्स गण सल्लेरी गुल्ममा पनि दिवसको अवसर पारेर वृक्षरोपण गरिएको अधिकृत जैसवालले बताउनुभयो ।