कोशी प्रदेशको पर्यटन गुरुयोजना निमार्ण गर्न सोलुमा सरोकारवाला गोष्ठी

जेठ १७, सोलुखुम्बु । हिमाली जिल्ला सोलुखुम्बुमा कोशी प्रदेशको पर्यटन गुरुयोजना निर्माण जिल्ला स्तरीय सरोकारवाला गोष्ठी कार्यक्रम सम्पन्न भएको छ । बिहिवार पर्यटन वन तथा वातावरण मन्त्रालय कोशी प्रदेशको आयोजना तथा डिभिजन वन कार्यालयको सहकार्यमा जिल्ला समन्वय समितिको समिक्षालय हलमा पर्यटन गुरुयोजना निर्माण गोष्ठी सम्पन्न भएको हो ।

कोशी प्रदेशलाई पर्यटकीय दृष्टिले आकर्षक गन्तव्य स्थलका रुपमा विकास गरी सर्वसाधारणको जीविकोपार्जनका लागि रोजगारीको अवसर लगायत उत्पादनशीलता, जनताको जीवनस्तर र आर्थिक वृद्धिदर सँगसँगै राजश्वमा थप योगदान पुर्याउन गुरुयोजना आवश्यक रहेको ग्रिड नेस्ट साउथ एसियन जेभी काठमाडौँका प्रमुख पवन कुमार मल्लिवले बताउनुभयो ।

प्रदेशका प्राकृतिक, सांस्कृतिक, जैविक तथा मानवनिर्मित सम्पदाको खोज, संरक्षण, सम्बद्र्धन एवं विकास गरी प्रदेशलाई पर्यटकीय दृष्टिले आकर्षक गन्तव्यस्थलका रुपमा विकास गर्दै अघि बढ्ने मन्त्रालयको योजना छ । मन्त्रालयले गुरुयोजना परामर्शदाताबाट तयार गर्न लागेको प्रमुख मल्लिवलको भनाई छ ।

कोशी प्रदेशको पर्यटन क्षेत्रको समग्र वर्तमान अवस्थाको बारेमा जानकारी गराउदै पर्यटन प्रवद्र्धनका लागी स्थानीय सरकार, प्रदेश सरकार र संघिय सरकारको निति निर्माण एक नहुदाँ समस्या देखिएको बताउनुभएको छ । यस्तै जिल्ला समन्वय समितिका प्रमुख कृष्ण प्रसाद निरौलाले सोलुखुम्बु जिल्लाको धार्मिक र सांस्कृतिक पक्षलाई गुरुयोजनामा समावेश गर्न आग्रह गर्नुभएको छ ।