शिक्षकहरुका लागी ५ दिने आइसिटी सम्बन्धी तालिम सुरु 

जेठ १७ सोलुखुम्बु ।  सोलुखुम्बुमा शिक्षकहरूका लागी आइसिटी सम्बन्धी ५ दिने तालिम सुरु भएको छ । बुधबार १६ गतेबाट जिल्ला सदरमुकाम नजिकै रहेको गार्मा माविमा जिल्लाका ३० वटा विद्यालयका ३० जना शिक्षकलाई आइसिटी सम्बन्धी तालिम सुरु गरिएको हो ।

ग्रामीण शिक्षा तथा वातावरण विकास केन्द्र रीड नेपालको आयोजना तथा सोलुदुधकुण्ड नगरापालिका, नेचासल्यान गाउँपालिका र लिखुपिके गाउँपालिकाको समन्वयमा  शिक्षकहरूलाई आइसिटी सम्बन्धी तालिमको आयोजना गरिएको हो । तालिममा सोलुदुधकुण्ड नगरपालिकाका १३ जना शिक्षक सहभागि भएका छन ।  

यस्तै नेचासल्यान गाउँपालिकाका १२ जना र लिखुपिके गाउँपालिकाका ५ जना शिक्षक तालिममा सहभागि छन ।   तालिममा सहभागि शिक्षकहरूलाई सामुदायिक विद्यालयमा हुने शिक्षण सिकाइमा प्रविधिको प्रयोग सम्बन्धी आवश्यक ज्ञान सीप प्रदान गरिने जनाइएको छ । प्रविधिको युग भएकाले शिक्षण सिकाइमा कम्प्युटर तथा अन्य विद्युतीय सामाग्रीको प्रयोग गर्दा शिक्षकहरूलाई शिक्षण सिकाइमा सहजहोस भनेर तालिमको आयोजना गरिएको रीड नेपालका शिक्षा विकास संयोजक केशव गिरिले बताउनुभयो ।

अन्य ५ पालिकाहरूमा पनि चाँडै यो किसिमको तालिम आयोजना गर्दै जिल्ला भरका ५० जना शिक्षकहरूलाई आइसिटी सम्बन्धी तालिम दिइने संयोजक गिरिले बताउनुभयो । ५ दिने आइसिटी सम्बन्धी तालिमको प्रशिक्षण आइसिटी विज्ञ पदमराज पन्तले गरिरहनुभएको छ  भने तालिम २० गते सम्पन्न हुने छ ।