डेंगी सङ्क्रमणको समय नजिक आइरहँदा सतर्कता अपनाउन आग्रह 

जेठ १८, साेलुखुम्बु । लामखुट्टेको टोकाइबाट लाग्ने रोग डेंगु फैलने समय नजिकिएकाले सतर्कता अपनाउनु पर्ने समय आएको छ । वर्षायाम सुरु भएसँगै महामारी जन्य रोग डेँगुको जोखिम बढ्दै गएपछि सतर्कता अपनाउन स्वास्थ्य कार्यालय सोलुखुम्बुले अनुरोध गरेको हो ।

एडिस एजेप्टाई जातको लामखुट्टेको टोकाइबाट लाग्ने रोग डेंगु नियन्त्रणका लागी समुदाय र स्थानीय सरकार र सरोकारवालहरुको उत्तिकै साथ आवश्यक पर्ने भन्दै आवश्यक प्रतिकार्य योजना निर्माणमा समयमै ध्यान दिएर लाग्न सके जोखिम कम गर्न सकिने स्वास्थ्य कार्यालय सोलुखुम्बुका प्रमुख सुमन तिवारीको भनाई छ । स्वास्थ्य कार्यालयमा अहिले डेंगु परिक्षण भइरहेकाले यो वर्ष हाल सम्म डेँगुका बिरामी फेला नपरेको भएपनि जोखिमताको समयका लागी कार्यालय सचेत रहेको उहाँको भनाई छ ।  

कार्यालयमा आउने २ महिना सम्मका लागी डेंगु परिक्षण किट मौज्दात रहेको र जिल्लाका स्वास्थ्य संस्थाहरूमा पनि यो किट पठाइसकिएको उहाँको भनाई छ ।  विशेषगरि डेंगु संक्रमण जिल्ला बाहिर बाट आउने मानिसहरूमा संक्रमण भएर आउँदा जिल्लामामा फैलिने जोखिम भएकाले विशेष सतर्कता अटाउनुपर्ने स्वास्थ्य कार्यालय सोलुखुम्बुका महामारी फोकल पर्सन अशोक सिवाकोटीको भनाई छ ।  

यसबाट बच्न स्वास्थ्य सतर्कता अपनाउँदैन घर वरिपरिको खाल्डाखुल्डी पुर्ने, पुरे सरिर ढाक्ने कपडा लागउने, स्वास्थ्य समस्या आए नजिकको स्वास्थ्य संस्थामा गएर चेकजाँच गराउनु पर्ने उहाँको भनाई छ । जिल्लामा मानिसहरूको बढी आवतजावत हुने पालिकाहरू सोलुदुधकुण्ड र नेचासल्यान गाउँपालिका डेंगु सङ्क्रमणको जोखिममा रहेको बताइएको छ ।