चिशंखुगढीमा अपाङ्गता भएका व्यक्तिहरूलाई सहायक सामग्री र आयआर्जनका उपकरण हस्तान्तरण

असार २१, सोलुखुम्बु । ओखलढुंगाको चिशंखुगढी गाउँपालिकामा अपाङ्गता भएका व्यक्तिहरूलाई सहायक सामग्री र आयआर्जनका उपकरण हस्तान्तरण गरिएको छ । शुक्रबार चिशंखुगढी गाउँपालिका, प्रदेश सरकार र करूणा फाउन्डेसन नेपालको त्रिपक्षीय लागत साझेदारीमा सञ्चालित अपाङ्गता रोकथाम तथा पुनःस्थापना कार्यक्रम अन्तर्गत विभिन्न सहयोग सामग्रीहरू हस्तान्तरण गरिएको हो ।

कार्यक्रममा राष्ट्रिय अपाङ्ग महासंघको प्राविधिक सहयोग रहेको छ । कार्यक्रममार्फत अपाङ्गता भएका व्यक्तिहरूलाई सहायक सामग्रीहरू प्रदान गर्नुका साथै तरकारी खेती तथा करेसावारी व्यवस्थापन तालिम प्राप्त गरेका लाभग्राहीलाई ड्रम र ट्रनेल प्रदान गरिएको गाउँपालिकाले जनाएको छ । त्यस्तै, बंगुर पालन तालिम लिएका लाभग्राहीलाई बंगुरका पाठा–पाठीहरू पनि वितरण गरिएको छ ।

सहयोग सामग्रीहरू चिशंखुगढी गाउँपालिका अध्यक्ष निशान्त शर्माले औपचारिक रुपमा हस्तान्तरण गर्नुभएको सहकर्मी सोभित ढुंगेलले जानकारी दिनुभयो । अध्यक्ष शर्माले कार्यक्रमले अपाङ्गता भएका व्यक्तिहरूको जीवनस्तर उकास्न र आत्मनिर्भर बनाउने दिशामा सहयोग पुग्ने विश्वास व्यक्त गर्नुभयो । कार्यक्रममा स्थानीय जनप्रतिनिधि, सम्बन्धित निकायका प्रतिनिधि, लाभग्राहीहरू र अन्य सरोकारवालाहरूको उपस्थिति रहेको थियो ।