रावा बेसी गाउँपालिकाद्वारा एसईई र कक्षा ८ का उत्कृष्ट विद्यार्थी सम्मानित

असार २८, सोेलुखुम्बु । खोटाङको रावा बेसी गाउँपालिकाले शैक्षिक सत्र २०८१ को माध्यमिक शिक्षा परीक्षा (एसइइ) तथा पालिका स्तरीय कक्षा ८ को वार्षिक परीक्षामा उत्कृष्ट हुने विद्यार्थीहरूलाई सम्मान तथा पुरस्कार वितरण गरेको छ । कार्यक्रममा एसइइ परीक्षामा उच्चतम ग्रेड हासिल गर्ने विद्यार्थीहरूलाई नगद पुरस्कार तथा प्रमाणपत्र प्रदान गरिएको थियो ।

छात्रतर्फ शारदा मावि हौंचुरका प्रबिन श्रेष्ठले ३.५२ जीपीए प्राप्त गरी उत्कृष्टता हासिल गरेका थिए भने छात्रातर्फ शारदा मावि खार्पाकी मनिसा राईले ३.३८ जीपीए ल्याएर पालिकास्तरीय उत्कृष्ट विद्यार्थी बनेकी थिइन् । दुबै जनालाई जनही २५ हजार रुपैयाँ नगद पुरस्कारसहित प्रमाणपत्र प्रदान गरिएको हो । यसैगरी, पालिका स्तरीय कक्षा ८ को वार्षिक परीक्षामा उच्चतम जीपीए ल्याउने विद्यार्थीहरूलाई समेत सम्मान गरिएको छ । छात्रतर्फ शारदा मावि हौंचुरका विनोद कार्कीले ३.६५ जीपीए तथा छात्रातर्फ देउराली मावि डुम्रेकोट डुम्रेधारापानीकी सन्ध्या पाण्डेले ३.७६ जीपीए ल्याएर अव्वल बनेका थिए ।

उनीहरूलाई जनही १० हजार रुपैयाँ नगद पुरस्कारसहित प्रमाणपत्र प्रदान गरिएको हो । कार्यक्रममा बोल्दै गाउँपालिका अध्यक्ष श्रेष्ठले विद्यार्थीहरूलाई निरन्तर मेहनत गर्न प्रेरणा दिँदै यस्ता सम्मान कार्यक्रमहरू शिक्षा क्षेत्रप्रति पालिकाको प्रतिबद्धताको प्रतीक भएको बताउनुभयो । प्रमुख अतिथिहरूले पनि विद्यार्थीहरूलाई उज्ज्वल भविष्यका लागि शुभकामना व्यक्त गरेका थिए ।

गाउँपालिका अध्यक्ष फटिक कुमार श्रेष्ठको अध्यक्षतामा सम्पन्न उक्त सम्मान कार्यक्रममा उपाध्यक्ष कौशिला कुमारी गुरुङ, वडा अध्यक्षहरू, शिक्षा समितिका सदस्यहरू, स्थानीय समाजसेवी, शिक्षक, अभिभावक तथा विद्यार्थीहरूको उपस्थिति रहेको शिक्षा शाखा प्रमुख युबराज बिष्टले जानकारी दिनुभयो ।